درد کا میرے مداوا وہ کریں یا نہ کریں

درد کا میرے مداوا وہ کریں یا نہ کریں

میں ہوں مشکور دم نزع جو پردا نہ کریں

مے سے لبریز عنایت جو وہ پیمانہ کریں

واعظا نوش اسے رند کریں یا نہ کریں

عشق صادق جو ذرا اپنا اثر دکھلا دے

بے حجاب آئیں نظر وہ کبھی پردا نہ کریں

فصل گل آئے بھی صیاد اگر گلشن میں

ہم وہ بلبل ہیں رہائی کی تمنا نہ کریں

تیرے کوچے میں جو مل جائے جگہ مرقد کی

باغ فردوس کی عشاق تمنا نہ کریں

جلوہ گر دل میں ہے تو جن کے کسی صورت وہ

رخ حرم کا نہ کریں عزم کلیسا نہ کریں

تیرے کوچے میں میسر ہے جنہیں روز طواف

کعبے کی سمت وہ بھولے سے بھی سجدہ نہ کریں

اس کا دیدار کسی طرح نہیں ممکن ہے

شکل آئینہ جو ہم دل کو مصفا نہ کریں

یار بالیں پہ ہے ٹھہریں ملک الموت ذرا

روح کے قبض کا کچھ دیر ارادہ نہ کریں

دم کا مہمان ہوں دم لب پہ ہے اے جان جہاں

آپ گھر جانے کا اس وقت ارادہ نہ کریں

مرتے دم نام ترا منہ سے نکل جائے اگر

پھر نکیرین لحد میں کوئی جھگڑا نہ کریں

دیر و کعبہ تو حقیقت میں ہیں اس کے گھر میں

باہمی گبر و مسلماں کوئی جھگڑا نہ کریں

dard ka mere mudawa wo karen ya na karen

main hun mashkur dam-e-nazaa jo parda na karen

mai se labrez inayat jo wo paimana karen

waza nosh use rind karen ya na karen

ishq-e-sadiq jo zara apna asar dikhla de

be hijab aen nazar wo kabhi parda na karen

fasl-e-gul ae bhi sayyad agar gulshan mein

ham wo bulbul hain rihai ki tamanna na karen

tere kuche mein jo mil jae jagah marqad ki

bagh firdaus ki ushshaq tamanna na karen

jalwa gar dil mein hai to jin ke kisi surat wo

rukh haram ka na karen azm-e-kalisa na karen

tere kuche mein muyassar hai jinhen roz tawaf

kaabe ki samt wo bhule se bhi sajda na karen

us ka didar kisi tarah nahin mumkin hai

shakl-e-aina jo ham dil ko musaffa na karen

yar balin pe hai thahren mulk almut zara

ruh ke qabz ka kuchh der irada na karen

dam ka mehman hun dam lab pe hai ai jan-e-jahan

ap ghar jane ka is waqt irada na karen

marte dam nam tira munh se nikal jae agar

phir nakirain lahad mein koi jhagra na karen

dair-o-kaaba to haqiqat mein hain us ke ghar mein

bahami gabr-o-musalman koi jhagra na karen