در پہ رہے یہ دیدۂ گریاں تمام عمر

در پہ رہے یہ دیدۂ گریاں تمام عمر

لیکن بجھی نہ آتش ہجراں تمام عمر

ڈالا ہے اس کو جذب محبت نے چاہ میں

دیکھا نہ جس نے تھا کبھی زنداں تمام عمر

واقع میں یہ ہے حرف شکایت بھی کیا کہیں

نکلا نہ کوئی جو مرا ارماں تمام عمر

پامال کو بھی ہم نے کیا اپنا ہم جلیس

چھانا کیا میں خاک بیاباں تمام عمر

راتوں کو میرے واسطے اٹھتا ہے بار بار

بھولوں گا درد دل کا نہ احساں تمام عمر

کیا مجھ کو اپنی یاد سے خلقت نے کھو دیا

سمجھا کیا میں آپ کو انساں تمام عمر

عارفؔ لکھیں ہیں اس میں مضامین انتشار

ہووے گا جمع میرا نہ دیواں تمام عمر

dar pe rahe ye dida-e-giryan tamam umr

lekin bujhi na atish-e-hijran tamam umr

dala hai us ko jazb-e-mohabbat ne chah mein

dekha na jis ne tha kabhi zindan tamam umr

waqe mein ye hai harf-e-shikayat bhi kya kahen

nikla na koi jo mira arman tamam umr

pamal ko bhi ham ne kiya apna ham jalis

chhana kiya main khak bayaban tamam umr

raton ko mere waste uthta hai bar bar

bhulunga dard-e-dil ka na ehsan tamam umr

kya mujh ko apni yad se khilqat ne kho diya

samjha kiya main ap ko insan tamam umr

arif likhen hain is mein mazamin-e-intishar

howe ga jama mera na diwan tamam umr