در مے خانہ سے دیوار چمن تک پہنچے

در مے خانہ سے دیوار چمن تک پہنچے

ہم غزالوں کے تعاقب میں ختن تک پہنچے

ہاتھ مے خواروں کے بے قصد اٹھے تھے لیکن

اتفاقاً ترے گیسو کی شکن تک پہنچے

مدرسے میں کہاں اس زلف کا موضوع جدید

لوگ پہنچے تو روایات کہن تک پہنچے

راستہ ایک تھا ہم عشق کے دیوانوں کا

قد و گیسو سے چلے دار و رسن تک پہنچے

آئیں ہم دست درازی پہ تو میخانے سے

سلسلہ انجمن سرو و سمن تک پہنچے

اک قبائے سبک و تنگ میں سو سو ہیں طلسم

کیا کوئی حسن کے اسرار کہن تک پہنچے

آپ ہی آپ جو کھل جائے تری زلف دراز

ناگہاں بے ہنری نقطۂ فن تک پہنچے

اے سخن فہم ہم اس بزم سے آئے ہیں جہاں

حیرت آئینۂ اسلوب سخن تک پہنچے

اس طرح شوق غزالاں میں غزل خواں ہو ظفر

شہرت مشک غزل شہر ختن تک پہنچے

dar-e-mai khana se diwar-e-chaman tak pahunche

ham ghazalon ke taaqub mein khutan tak pahunche

hath mai khwaron ke be qasd uthe the lekin

ittifaqan tire gesu ki shikan tak pahunche

madrase mein kahan is zulf ka mauzu-e-jadid

log pahunche to riwayat-e-kuhan tak pahunche

rasta ek tha ham ishq ke diwanon ka

qad-o-gesu se chale dar-o-rasan tak pahunche

aen ham dast darazi pe to maikhane se

silsila anjuman-e-sarw-o-saman tak pahunche

ik qaba-e-subuk-o-tang mein sau sau hain tilism

kya koi husn ke asrar-e-kuhan tak pahunche

ap hi ap jo khul jae tiri zulf-e-daraz

nagahan be hunari nuqta-e-fan tak pahunche

ai sukhan fahm ham is bazm se ae hain jahan

hairat aina-e-uslub-e-sukhan tak pahunche

is tarah shauq ghazalan mein ghazal khwan ho zafar

shohrat-e-mushk ghazal shahr-e-khutan tak pahunche