در تلک جانے کی ہے اس کے مناہی ہم کو

در تلک جانے کی ہے اس کے مناہی ہم کو

اپنی بس اب نظر آتی ہے تباہی ہم کو

روز جوں توں کہ ہوا شام تو پھر بہتر عذاب

نظر آئی شب ہجراں کی سیاہی ہم کو

ہم تو جانے کا ارادہ نہیں کرتے لیکن

وہ کمر سوئے عدم کرتی ہے راہی ہم کو

کیوں ترے چاہ زنخداں کا نہ نظارہ کریں

جی سے بھاتا ہے بہت سبزۂ چاہی ہم کو

دام بر دوش ہی مخلوق کیا خالق نے

طاقت اڑنے کی نہ دی جوں پر ماہی ہم کو

پردہ پڑتا جو نہیں اس سے خوش اندامی پر

پیارا لگتا ہے ترا کرتۂ لاہی ہم کو

عمر بھر شعر کہے ہم نے پہ تو نے اے عشق

نہ تو حزنی ہی کیا اور نہ آہی ہم کو

مصحفیؔ علم لغت سے ہے جنہیں آگاہی

جانتے ہیں وہ ابو نصر فراہی ہم کو

dar talak jane ki hai us ke manahi ham ko

apni bas ab nazar ati hai tabahi ham ko

roz jun tun ke hua sham to phir behtar azab

nazar ai shab-e-hijran ki siyahi ham ko

ham to jane ka irada nahin karte lekin

wo kamar su-e-adam karti hai rahi ham ko

kyun tire chah-e-zanakhdan ka na nazzara karen

ji se bhata hai bahut sabza-e-chahi ham ko

dam bar dosh hi makhluq kiya khaliq ne

taqat urne ki na di jun par mahi ham ko

parda parta jo nahin us se khush andami par

pyara lagta hai tira kurta-e-lahi ham ko

umr bhar sher kahe ham ne pe tu ne ai ishq

na to huzni hi kiya aur na ahi ham ko

mushafi ilm-e-lughat se hai jinhen agahi

jante hain wo abu nasr farahhi ham ko