در پردہ ستم ہم پہ وہ کر جاتے ہیں کیسے

در پردہ ستم ہم پہ وہ کر جاتے ہیں کیسے

گر کیجے گلہ صاف مکر جاتے ہیں کیسے

آنے میں تو سو طرح کی صحبت تھی شب وصل

دیکھیں گے پر اب اٹھ کے سحر جاتے ہیں کیسے

رنجش کا مری پاس نہیں آپ کو مطلق

برہم تجھے ہم دیکھ کے ڈر جاتے ہیں کیسے

غصہ میں نیا رنگ نکالے ہیں پری رو

جوں جوں یہ بگڑتے ہیں سنور جاتے ہیں کیسے

اس صاحب عصمت کو یہی سوچ ہے ہر صبح

بے وجہ مرے بال بکھر جاتے ہیں کیسے

ایام مصیبت کے تو کاٹے نہیں کٹتے

دن عیش کے گھڑیوں میں گزر جاتے ہیں کیسے

وو وقت تو آنے دے بتا دیں گے شہیدیؔ

بن آئے کسی شخص پہ مر جاتے ہیں کیسے

dar parda sitam ham pe wo kar jate hain kaise

gar kije gila saf makar jate hain kaise

ane mein to sau tarah ki sohbat thi shab-e-wasl

dekhenge par ab uth ke sahar jate hain kaise

ranjish ka miri pas nahin ap ko mutlaq

barham tujhe ham dekh ke dar jate hain kaise

ghussa mein naya rang nikale hain pari ru

jun jun ye bigarte hain sanwar jate hain kaise

is sahab-e-ismat ko yahi soch hai har subh

be wajh mire bal bikhar jate hain kaise

ayyam musibat ke to kate nahin katte

din aish ke ghariyon mein guzar jate hain kaise

wo waqt to ane de bata denge shahidi

ban ae kisi shakhs pe mar jate hain kaise