آفتاب آئے چمک کر جو سر جام شراب
احمد حسین مائلآفتاب آئے چمک کر جو سر جام شراب
رند سمجھیں کہ ہے صادق سحر جام شراب
سب کے ہاتھوں پہ تھا شب بھر سفر جام شراب
ہر خط دست بنا رہ گزر جام شراب
دختر رز پہ گریں مست پتنگوں کی طرح
شمع محفل ہو یہ لخت جگر جام شراب
تھام لے دست سبو آئے جو چلنے میں لچک
خط بغداد ہو موئے کمر جام شراب
طور سینا کا گماں ہو خم مے پر سب کو
اس طرح ہوش اڑاؤ اثر جام شراب
ساغر مے میں نہیں پرتو خال ساقی
ہے کف دختر رز میں سپر جام شراب
خاک مے خانہ کی بن جاتی قیامت پس کر
ہر قدم پر جو لچکتی کمر جام شراب
آج مے نوشوں کا مجمع ہے کہاں اے ساقی
کون سی بزم میں ہے شور و شر جام شراب
جتنے مے خوار ہیں ساقی سے گلے ملتے ہیں
سحر عید بنی ہے خبر جام شراب
شیشۂ مے سے اڑا کاگ کبوتر کی طرح
نامہ پہنچانے چلا نامہ بر جام شراب
موج صہبا پہ گرا سپنۂ مینا اڑ کر
ہے مرے سامنے تیغ و سپر جام شراب
مے پلاتا ہے اگر ڈھانپ لے سینہ ساقی
تیرے جوبن کو لگے گی نظر جام شراب
آفتاب آ کے سکھاتا ہے چلن شب بھر کا
رات کو ہوتا ہے اکثر گزر جام شراب
دست ساقی میں رہے دست قدح کش میں رہے
گردن شیشۂ صہبا کمر جام شراب
مست کرتے ہیں دو عالم کو یہی دو خود مست
لذت نغمۂ مطرب اثر جام شراب
کیا غضب ہے کہ ترا ہونٹھ نہ چوسے مائلؔ
اور ہو تیرے لبوں تک گزر جام شراب
aftab ae chamak kar jo sar-e-jam-e-sharab
rind samjhen ke hai sadiq sahar-e-jam-e-sharab
sab ke hathon pe tha shab bhar safar-e-jam-e-sharab
har khat dast bana rah guzar jam-e-sharab
dukhtar-e-raz pe giren mast patangon ki tarah
sham-e-mahfil ho ye lakht-e-jigar jam-e-sharab
tham le dast-e-subu ae jo chalne mein lachak
khat-e-baghdad ho mu-e-kamar jam-e-sharab
tur-e-sina ka guman ho kham-e-mai par sab ko
is tarah hosh urao asar jam-e-sharab
saghar-e-mai mein nahin partau khal-e-saqi
hai kaf-e-dukhtar-e-raz mein sipar jam-e-sharab
khak mai khana ki ban jati qayamat pas kar
har qadam par jo lachakti kamar-e-jam-e-sharab
aj mai noshon ka majmaa hai kahan ai saqi
kaun si bazm mein hai shor-o-shar-e-jam-e-sharab
jitne mai khwar hain saqi se gale milte hain
sahar eid bani hai khabar jam-e-sharab
shisha-e-mai se ura kag kabutar ki tarah
nama pahunchane chala nama bar jam-e-sharab
mauj-e-sahba pe gira sapna-e-mina ur kar
hai mire samne tegh-o-sipar-e-jam-e-sharab
mai pilata hai agar dhanp le sina saqi
tere joban ko lagegi nazar jam-e-sharab
aftab a ke sikhata hai chalan shab bhar ka
rat ko hota hai aksar guzar jam-e-sharab
dast-e-saqi mein rahe dast-e-qadah kash mein rahe
gardan-e-shisha-e-sahba-e-kamar jam-e-sharab
mast karte hain do alam ko yahi do khud mast
lazzat-e-naghma-e-mutrib asar-e-jam-e-sharab
kya ghazab hai ke tira honth na chuse mail
aur ho tere labon tak guzar jam-e-sharab