در پہ تیرے پکار کی فریاد

در پہ تیرے پکار کی فریاد

سمع تو نے نہ یار کی فریاد

نہیں سنتا ہے لالہ رو میرا

اس دل داغ دار کی فریاد

آہ سنتا ہے کب وہ رشک بہار

ہم نے گو اب ہزار کی فریاد

دیکھ اس رشک گل کو جوں بلبل

میں نے بے اختیار کی فریاد

ہجر میں تیرے میری آنکھوں نے

رو رو جیوں آبشار کی فریاد

روز سنتے ہیں ہم خزاں میں آہ

بلبلوں سے بہار کی فریاد

شرر گرم عشق پر جل کے

دل نے اسپند وار کی فریاد

کون سنتا ہے کس سے جا کہیے

اس دل بے قرار کی فریاد

نالۂ زار کو مرے سن کر

نے نیں ہو دل فگار کی فریاد

راہ الفت میں میں نے ہو دل چاک

جیوں جرس بار بار کی فریاد

گل نے بلبل کی سن لی سن تو بھی

اپنے مہجور زار کی فریاد

اف نہ حلق بریدہ نے کی مرے

خنجر آب دار کی فریاد

ہو گیا خاک پر کسی سے نہ کی

میں نے اس شہسوار کی فریاد

کیا جہاں دارؔ عرض کرتا ہے

سنیو اس خاکسار کی فریاد

dar pe tere pukar ki fariyad

sama tu ne na yar ki fariyad

nahin sunta hai lala ru mera

is dil-e-dagh dar ki fariyad

ah sunta hai kab wo rashk-e-bahar

ham ne go ab hazar ki fariyad

dekh is rashk-e-gul ko jun bulbul

main ne be ikhtiyar ki fariyad

hijr mein tere meri ankhon ne

ro ro jyun abshar ki fariyad

roz sunte hain ham khizan mein ah

bulbulon se bahar ki fariyad

sharar-e-garm ishq par jal ke

dil ne ispand war ki fariyad

kaun sunta hai kis se ja kahiye

is dil-e-be qarar ki fariyad

nala-e-zar ko mire sun kar

ne nain ho dil figar ki fariyad

rah-e-ulfat mein main ne ho dil-e-chak

jyun jaras bar bar ki fariyad

gul ne bulbul ki sun li sun tu bhi

apne mahjur zar ki fariyad

uf na halq-e-burida ne ki mire

khanjar-e-ab dar ki fariyad

ho gaya khak par kisi se na ki

main ne is shahsawar ki fariyad

kya jahan dar-e-arz karta hai

suniyo is khaksar ki fariyad