خود مزے دار طبیعت ہے تو ساماں کیسا

خود مزے دار طبیعت ہے تو ساماں کیسا

زخم دل آپ ہیں شورش پہ نمکداں کیسا

ہاتھ وحشت میں نہ پونچھے تو گریباں کیسا

خار صحرا سے نہ الجھے تو وہ داماں کیسا

کوچۂ یار کو دعویٰ ہے کہ جنت میں ہوں

خلد کہتے ہیں کسے روضۂ رضواں کیسا

اسی معبود کا ہے دیر و حرم میں جلوہ

بحث کس بات کی ہے گبر و مسلماں کیسا

وعدۂ بادۂ اطہر کا بھروسہ کب تک

چل کے بھٹی پہ پئیں جرعۂ عرفاں کیسا

ہم ہوئے قیسؔ ہوئے وامقؔ و فرہادؔ ہوئے

زلف پر خم نے کیا سب کو پریشاں کیسا

دور کے ڈھول ہیں یوسف کی کہانی صاحب

کس کو معلوم ہے ہوگا مہ کنعاں کیسا

تیرے قربان میں اتنا تو بتا دے قاتل

میری گردن پہ چلا خنجر براں کیسا

دل کے آئینہ میں تصویر صنم رکھتا ہے

نہیں معلوم کہ آغاؔ ہے مسلماں کیسا

khud maze dar tabiat hai to saman kaisa

zakhm-e-dil ap hain shorish pe namakdan kaisa

hath wahshat mein na ponchhe to gareban kaisa

khar-e-sahra se na uljhe to wo daman kaisa

kucha-e-yar ko daawa hai ke jannat mein hun

khuld kahte hain kise rauza-e-rizwan kaisa

isi maabud ka hai dair-o-haram mein jalwa

bahs kis bat ki hai gabr-o-musalman kaisa

waada-e-bada-e-athar ka bharosa kab tak

chal ke bhatti pe piyen jura-e-irfan kaisa

ham hue qais hue wamiq-o-farhad hue

zulf par kham ne kiya sab ko pareshan kaisa

dur ke dhol hain yusuf ki kahani sahab

kis ko maalum hai hoga mah-e-kanan kaisa

tere qurban mein itna to bata de qatil

meri gardan pe chala khanjar-e-burran kaisa

dil ke aina mein taswir sanam rakhta hai

nahin maalum ke agha hai musalman kaisa