خوبرو سب کی جان ہوتے ہیں

خوبرو سب کی جان ہوتے ہیں

آرزوئے جہان ہوتے ہیں

گوشۂ دیوار تک تو جا نالے

اس میں گل کو بھی کان ہوتے ہیں

کبھو آتے ہیں آپ میں تجھ بن

گھر میں ہم میہمان ہوتے ہیں

دشت کے پھوٹے مقبروں پہ نہ جا

روضے سب گلستاں ہوتے ہیں

حرف تلخ ان کے کیا کہوں میں غرض

خوبرو بد زبان ہوتے ہیں

غمزۂ چشم خوش قدان زمیں

فتنۂ آسمان ہوتے ہیں

کیا رہا ہے مشاعرے میں اب

لوگ کچھ جمع آن ہوتے ہیں

میرؔ و مرزا رفیعؔ و خواجہ میرؔ

کتنے اک یہ جوان ہوتے ہیں

khubru sab ki jan hote hain

arzu-e-jahan hote hain

gosha-e-diwar tak to ja nale

is mein gul ko bhi kan hote hain

kabhu ate hain ap mein tujh bin

ghar mein ham mehman hote hain

dasht ke phute maqbaron pe na ja

roze sab gulistan hote hain

harf-e-talkh un ke kya kahon main gharaz

khubru bad zaban hote hain

ghamza-e-chashm-e-khush qadin zamin

fitna-e-asman hote hain

kya raha hai mushaare mein ab

log kuchh jama an hote hain

mir-o-mirza rafi-o-khwaja mir

kitne ik ye jawan hote hain