خوباں جو پہنتے ہیں نپٹ تنگ چولیاں

خوباں جو پہنتے ہیں نپٹ تنگ چولیاں

ان کی سجوں کو دیکھ مریں کیوں نہ لولیاں

ہونٹوں میں جم رہی ہے ترے آج کیوں دھری

بھیجی تھیں کس نے رات کو پانوں کی ڈھولیاں

جس دن سے انکھڑیاں تری اس کو نظر پڑیں

بادام نے خجل ہو پھر آنکھیں نہ کھولیاں

تارے نہیں فلک پہ تمہارے نثار کو

لایا ہے موتیوں سے یہ بھر بھر کے جھولیاں

سنبل کو پیچ و تاب عجب طرح کی ہوئی

زلفیں جب ان نے جا کے گلستاں میں کھولیاں

گلشن میں بحثنے کو تمہارے دہن کے ساتھ

کھولا تھا منہ کو کلیوں نے پر کچھ نہ بولیاں

تاباں قفس میں آج ہیں وے بلبلیں خموش

کرتی تھیں کل جو باغ میں گل سے کلولیاں

khuban jo pahante hain nipat tang choliyan

un ki sajon ko dekh maren kyun na loliyan

honton mein jam rahi hai tire aj kyun dhari

bheji thin kis ne rat ko panon ki dholiyan

jis din se ankhriyan tiri us ko nazar paren

badam ne khajil ho phir ankhen na khauliyan

tare nahin falak pe tumhare nisar ko

laya hai motiyon se ye bhar bhar ke jholiyan

sumbul ko pech-o-tab ajab tarah ki hui

zulfen jab un ne ja ke gulistan mein khauliyan

gulshan mein bahsne ko tumhare dahan ke sath

khola tha munh ko kaliyon ne par kuchh na boliyan

taban qafas mein aj hain we bulbulen khamosh

karti thin kal jo bagh mein gul se kaloliyan