خواہاں ہوں بوئے باغِ تنزہ شمیم کا

خواہاں ہوں بوئے باغِ تنزہ شمیم کا

یا رب ادھر بھی بھیج دے جھونکا نسیم کا

تیرے گدا کو سلطنتِ جم سے کیا، کہ ذوق

ہے کاسۂ شکستہ میں جامِ دو نیم کا

نیرنگِ جلوہ، بارقۂ ہوش سوز ہے

کیا امتیاز رنگ سے کیجے شمیم کا

تیری نسیم لطف سے گل کو شگفتگی

وابستہ تیرے حکم پہ چلنا نسیم کا

واجب کی حکمت آئے گی ممکن کی عقل میں؟

کتنا دماغ ہے خلل آگیں حکیم کا

دقت سے پہلے عجز سلامت کی راہ ہے

کیسا سپاس دار ہوں عقلِ سلیم کا

میری فنا ہے مشعلۂ محفلِ بقا

پروانہ ہوں میں پرتوِ شمعِ قدیم کا

گر تیرے شوق میں ہیں یہی بے قراریاں

لے لوں گا بوسہ پایۂ عرشِ عظیم کا

طاعت اگر نہیں تو نہ ہو یاس کس لئے

وابستۂ سبب ہے کرم کب کریم کا

جس وقت تیرے لطف کے دریا کو جوش آئے

فوارۂ جناں ہو زبانہ جحیم کا

اے شیفتہ عذابِ جہنم سے کیا مجھے

میں اُمتی ہوں نار و جناں کے قسیم کا

khwahan hun bu-e-bagh-e-tanazzoh shamim ka

ya rab idhar bhi bhej de jhonka nasim ka

tere gada ko saltanat-e-jam se kya, ke zauq

hai kasa-e-shikasta mein jam-e-do nim ka

nairang-e-jalwa, baraqqa-e-hosh soz hai

kya imtiyaz-e-rang se kije shamim ka

teri nasim-e-lutf se gul ko shaguftagi

wabasta tere hukm pe chalna nasim ka

wajib ki hikmat aegi mumkin ki aql mein?

kitna dimagh hai khalal agin hakim ka

diqqat se pahle ijz salamat ki rah hai

kaisa sipas dar hun aql-e-salim ka

meri fana hai mashala-e-mahfil-e-baqa

parwana hun main partau-e-sham-e-qadim ka

gar tere shauq mein hain yahi be qarariyan

le lunga bosa paya-e-arsh-e-azim ka

taat agar nahin to na ho yas kis liye

wabasta-e-sabab hai karam kab karim ka

jis waqt tere lutf ke dariya ko josh ae

fawwara-e-janan ho zubana jahim ka

ai shefta azab-e-jahannam se kya mujhe

main umati hun nar-o-janan ke qisyam ka