خواہاں ترے ہر رنگ میں اے یار ہمیں تھے

خواہاں ترے ہر رنگ میں اے یار ہمیں تھے

یوسف تھا اگر تو تو خریدار ہمیں تھے

بیداد کی محفل میں سزا وار ہمیں تھے

تقصیر کسی کی ہو گنہ گار ہمیں تھے

وعدہ تھا ہمیں سے لب بام آنے کا ہونا

سایہ کی طرح سے پس دیوار ہمیں تھے

کنگھی تری زلفوں کی ہمیں پر تھی مقرر

آئینہ دکھاتے تجھے ہر بار ہمیں تھے

نعمت تھی ترے حسن کی حصہ میں ہمارے

تو کان ملاحت تھا خریدار ہمیں تھے

سودا زدہ زلفوں کا نہ تھا اپنے سوا ایک

آزاد دو عالم تھا گرفتار ہمیں تھے

تو اور ہم اے دوست تھے یک جان دو قالب

تھا غیر سوا اپنے جو تھا یار ہمیں تھے

بیمار محبت تھا سوا اپنے نہ کوئی

اک مستحق شربت دیدار ہمیں تھے

بے اپنے بہلتی تھی طبیعت نہ کسی سے

دل سوز ہمیں تھے ترے غم خوار ہمیں تھے

اک جنبش مژگاں سے غش آتا تھا ہمیں کو

دو نرگس بیمار کے بیمار ہمیں تھے

جب چاہتے تھے لیتے تھے آغوش میں تم کو

مجبور سے رہ جاتے تھے مختار ہمیں تھے

ہم سا نہ کوئی چاہنے والا تھا تمہارا

مرتے تھے ہمیں جان سے بیزار ہمیں تھے

بد نام محبت نے تری ہم کو کیا تھا

رسوائے سر کوچہ و بازار ہمیں تھے

دل ٹھوکریں کھاتا تھا نہ ہر گام کسی کا

اک خاک میں ملتے دم رفتار ہمیں تھے

بھڑکانے سے آتشؔ کو جلانے لگے یا تو

الطاف و عنایت کے سزا وار ہمیں تھے

khwahan tire har rang mein ai yar hamen the

yusuf tha agar to to kharidar hamen the

bedad ki mahfil mein saza war hamen the

taqsir kisi ki ho gunah gar hamen the

waada tha hamen se lab-e-bam ane ka hona

saya ki tarah se pas-e-diwar hamen the

kanghi tiri zulfon ki hamen par thi muqarrar

aina dikhate tujhe har bar hamen the

nemat thi tire husn ki hissa mein hamare

tu kan-e-malahat tha kharidar hamen the

sauda zada zulfon ka na tha apne siwa ek

azad do alam tha giraftar hamen the

tu aur ham ai dost the yak jan do qalib

tha ghair siwa apne jo tha yar hamen the

bimar-e-mohabbat tha siwa apne na koi

ik mustahiq-e-sharbat didar hamen the

be apne bahalti thi tabiat na kisi se

dil soz hamen the tire gham khwar hamen the

ik jumbish-e-mizhgan se ghash ata tha hamen ko

do nargis-e-bimar ke bimar hamen the

jab chahte the lete the aghosh mein tum ko

majbur se rah jate the mukhtar hamen the

ham sa na koi chahne wala tha tumhara

marte the hamen jan se bezar hamen the

bad nam mohabbat ne tiri ham ko kiya tha

ruswa-e-sar-e-kucha-o-bazar hamen the

dil thokaren khata tha na har gam kisi ka

ik khak mein milte dam-e-raftar hamen the

bhirkane se atish ko jalane lage ya to

altaf-o-inayat ke saza war hamen the