خوب تھے وے دن کہ ہم تیرے گرفتاروں میں تھے

خوب تھے وے دن کہ ہم تیرے گرفتاروں میں تھے

غم زدوں اندوہ گینوں ظلم کے ماروں میں تھے

دشمنی جانی ہے اب تو ہم سے غیروں کے لیے

اک سماں سا ہو گیا وہ بھی کہ ہم یاروں میں تھے

مت تبختر سے گزر قمری ہماری خاک پر

ہم بھی اک سرو رواں کے ناز برداروں میں تھے

مر گئے لیکن نہ دیکھا تو نے اودھر آنکھ اٹھا

آہ کیا کیا لوگ ظالم تیرے بیماروں میں تھے

شیخ جی مندیل کچھ بگڑی سی ہے کیا آپ بھی

رندوں بانکوں میکشوں آشفتہ دستاروں میں تھے

گرچہ جرم عشق غیروں پر بھی ثابت تھا ولے

قتل کرنا تھا ہمیں ہم ہی گنہ گاروں میں تھے

اک رہا مژگاں کی صف میں ایک کے ٹکڑے ہوئے

دل جگر جو میرؔ دونوں اپنے غم خواروں میں تھے

khub the we din ke ham tere giraftaron mein the

gham zadon andoh gainon zulm ke maron mein the

dushmani jani hai ab to ham se ghairon ke liye

ik saman sa ho gaya wo bhi ke ham yaron mein the

mat tabakhtur se guzar qumri hamari khak par

ham bhi ik sarw rawan ke naz bardaron mein the

mar gae lekin na dekha tu ne udhar ankh utha

ah kya kya log zalim tere bimaron mein the

shaikh ji mandil kuchh bigri si hai kya ap bhi

rindon bankon maikashon ashufta dastaron mein the

garche jurm-e-ishq ghairon par bhi sabit tha wale

qatl karna tha hamen ham hi gunah garon mein the

ik raha mizhgan ki saf mein ek ke tukre hue

dil jigar jo mir donon apne gham khwaron mein the