حوصلے کیوں نہ دل چرخ کہن کے نکلے

حوصلے کیوں نہ دل چرخ کہن کے نکلے

مثل‌ یوسف نہ پھرے جو ہیں وطن کے نکلے

مر مٹے جو تری الفت میں وہ آزاد ہوئے

جیتے جی بند سے وہ رنج و محن کے نکلے

میں تو خوش ہو کے عوض اس کے دعائیں دوں گا

منہ سے دشنام جو اس غنچہ دہن کے نکلے

گالیاں دے کے تو کر پیار سے باتیں اے شوخ

ہم تو شیدا ترے انداز سخن کے نکلے

سرفروشوں کو خبر دو سر مقتل آئیں

ہاتھ میں تیغ لئے آج وہ تن کے نکلے

سرو‌ و شمشاد و صنوبر جو کھڑے ہیں لب جو

علم سبز ہیں ماتم میں حسن کے نکلے

گھر سے ہم اپنے گناہوں کی حیا سے عاجزؔ

منہ چھپائے ہوئے گھونگھٹ میں کفن کے نکلے

hausle kyun na dil-e-charkh-e-kuhan ke nikle

misl-e-yusuf na phire jo hain watan ke nikle

mar mite jo tiri ulfat mein wo azad hue

jite ji band se wo ranj-o-mehan ke nikle

main to khush ho ke ewaz us ke duaen dunga

munh se dushnam jo is ghuncha dahan ke nikle

galiyan de ke to kar pyar se baten ai shokh

ham to shaida tire andaz-e-sukhan ke nikle

sarfaroshon ko khabar do sar-e-maqtal aen

hath mein tegh liye aj wo tan ke nikle

sarw-o-shamshad-o-sanobar jo khare hain lab jo

ilm-e-sabz hain matam mein husn ke nikle

ghar se ham apne gunahon ki haya se ajiz

munh chhupae hue ghunghat mein kafan ke nikle