حوصلہ وجہ تپش ہائے دل و جاں نہ ہوا

حوصلہ وجہ تپش ہائے دل و جاں نہ ہوا

شعلۂ شمع تری بزم میں رقصاں نہ ہوا

حسن تھا مست ازل جام انا لیلیٰ سے

تن کی عریانی سے مجنوں کوئی عریاں نہ ہوا

لب منصور سے دی کس نے انا الحق کی صدا

تو اگر پردۂ پندار میں پنہاں نہ ہوا

ہم رہے چشم عنایت سے ہمیشہ محروم

دل نشیں تیر نظر کا کوئی پیکاں نہ ہوا

چشم جاناں میں سماتے ہیں سمانے والے

موت سے آنکھ لڑانا کوئی آساں نہ ہوا

دل ہے بت خانۂ اصنام خیالی ساحرؔ

تو وہ کافر ہے کہ بھولے سے مسلماں نہ ہوا

hausla wajh-e-tapish ha-e-dil-o-jan na hua

shola-e-shama tiri bazm mein raqsan na hua

husn tha mast-e-azal jam-e-ana laila se

tan ki uryani se majnun koi uryan na hua

lab mansur se di kis ne ana alhaq ki sada

tu agar parda-e-pindar mein pinhan na hua

ham rahe chashm-e-inayat se hamesha mahrum

dil nashin tir-e-nazar ka koi paikan na hua

chashm-e-janan mein samite hain samane wale

maut se ankh larana koi asan na hua

dil hai but khana-e-asnam-e-khayali sahir

to wo kafir hai ke bhule se musalman na hua