حوادث ہم سفر اپنے تلاطم ہم عناں اپنا

حوادث ہم سفر اپنے تلاطم ہم عناں اپنا

زمانہ لوٹ سکتا ہے تو لوٹے کارواں اپنا

نسیم صبح سے کیا ٹوٹتا خواب گراں اپنا

کوئی نادان بجلی چھو گئی ہے آشیاں اپنا

ہمیں بھی دیکھ لو آثار منزل دیکھنے والو

کبھی ہم نے بھی دیکھا تھا غبار کارواں اپنا

مزاج حسن پر کیا کیا گزرتا ہے گراں پھر بھی

کسی کو آ ہی جاتا ہے خیال نا گہاں اپنا

ازل سے کر رہی ہے زندگانی تجربے لیکن

زمانہ آج تک سمجھا نہیں سود و زیاں اپنا

جمال دوست کو پیہم بکھرنا ہے سنورنا ہے

محبت نے اٹھایا ہے ابھی پردہ کہاں اپنا

ہمیشہ شمع بھڑکے گی سدا پیمانہ چھلکے گا

تری محفل میں ہم چھوڑ آئے ہیں جوش بیاں اپنا

hawadis ham safar apne talatum ham inan apna

zamana laut sakta hai to laute karwan apna

nasim-e-subh se kya tutta khwab-e-giran apna

koi nadan bijli chhu gai hai ashiyan apna

hamen bhi dekh lo asar-e-manzil dekhne walo

kabhi ham ne bhi dekha tha ghubar-e-karwan apna

mizaj-e-husn par kya kya guzarta hai giran phir bhi

kisi ko a hi jata hai khayal na gahan apna

azal se kar rahi hai zindagani tajribe lekin

zamana aj tak samjha nahin sud-o-ziyan apna

jamal-e-dost ko paiham bikharna hai sanwarna hai

mohabbat ne uthaya hai abhi parda kahan apna

hamesha shama bharkegi sada paimana chhalkega

tiri mahfil mein ham chhor ae hain josh-e-bayan apna