حلقہ حلقہ گھر بنا لخت دل بیتاب کا

حلقہ حلقہ گھر بنا لخت دل بیتاب کا

زلف جاناں میں ہے عالم سبحۂ سیماب کا

سونے میں نظارہ کر لوں روے عالمتاب کا

خوف کیا دزد نگہ کو ہے شب مہتاب کا

کھیل بھی بیتاب تھا طفلی میں اس بیتاب کا

پر اڑاتا تھا ہوا پر ماہیٔ بے آب کا

رک نہیں سکتا ہے دریا دیدۂ پر آب کا

پاٹ ہے رومال میرا دامن سیلاب کا

خواب میں یاران رفتہ سے ملاقاتیں ہوئیں

ہم نے سمجھا خضر غفلت کو رہ احباب کا

کہتے ہیں سب دیکھ کر بیتاب میرا عضو عضو

آدمی اب تک نہیں دیکھا کہیں سیماب کا

نیند کی صورت نہیں دیکھا بہ جز داغ جگر

پردہ میری آنکھ میں شاید کہ ہے کمخواب کا

لگ گئی آگ آتش رخ سے نقاب یار میں

دیکھ لو جلتا ہے کونا چادر مہتاب کا

مجلس بے شمع وہ ہیں شمع بے مجلس ہوں میں

غم مرا احباب کو ہے مجھ کو غم احباب کا

ہجر جاناں کے الم میں ہم فرشتے بن گئے

دھیان مدت سے چھٹا آب طعام و خواب کا

اہل تسلیم و رضا سے سر بلندوں کی ہے زیب

خوش نما زیر منار و قرب ہے محراب کا

جھک کے ہم نے بوسۂ ابرو کی جب مانگی دعا

حلقۂ آغوش پر عالم ہوا محراب کا

اس قدر فریاد محشر خیز اے بلبل نہ کر

دیکھنا تختہ نہ الٹے گلشن شاداب کا

مہر دست آویز غم ہے ہر بشر کا داغ غم

دل ہے محضر صحبت گم کردۂ احباب کا

بے تکلف آ گیا وہ مہ دم فکر سخن

رہ گیا پاس ادب سے قافیہ آداب کا

پرورش تقدیر کرتی ہے مجھے بہر قضا

ذبح کو پروردہ کرنا کام ہے قصاب کا

نشہ جرات زیادہ ہو گیا اے مے کشو

ساغر مے بن گیا کاسہ سر سہراب کا

موئے آتش دید ساں بل کھائے وہ موئے کمر

میں جو لکھوں گرم مضموں اس طلائی ڈاب کا

ہو گیا ہوں میں نقاب روئے روشن پر فقیر

چاہیے تہ بند مجھ کو چادر مہتاب کا

خال و خط سے عیب اس کے روئے اقدس کو نہیں

حسن ہے مصحف میں ہونا نقطۂ اعراب کا

دوست دشمن سے زیادہ تیز رکھتے ہیں چھری

برہمن بھی پیشہ اب کرنے لگے قصاب کا

ہونٹ پر انگشت رنگیں رکھ کے وہ کہنے لگے

شاخ مرجاں نے ثمر پیدا کیا عناب کا

لاغری کے ساتھ بیتابی یہی اے بحر حسن

خار ہے یہ جسم لاغر ماہیٔ بے آب کا

تیری فرقت میں جو آئے بھول کر آنکھوں میں نیند

مردمان چشم نے پھر منہ نہ دیکھا خواب کا

میرے مرغ دل کی بیتابی اڑائی کس طرح

حوصلہ ایسا نہیں ہے طائر سیماب کا

خدمت اقدس میں چل کر یہ غزل پڑھ اے منیرؔ

شہرہ سب اہل سخن میں ہے ترے نواب کا

halqa halqa ghar bana lakht-e-dil-e-betab ka

zulf janan mein hai alam subha-e-simab ka

sone mein nazara kar lun rawe alamtab ka

khauf kya duzd-e-nigah ko hai shab-e-mahtab ka

khel bhi betab tha tifli mein is betab ka

par urata tha hawa par mahi-e-be ab ka

ruk nahin sakta hai dariya dida-e-pur ab ka

pat hai rumal mera daman-e-sailab ka

khwab mein yaran-e-rafta se mulaqaten huin

ham ne samjha khizr ghaflat ko rah-e-ahbab ka

kahte hain sab dekh kar betab mera uzw uzw

admi ab tak nahin dekha kahin simab ka

nind ki surat nahin dekha ba juz dagh-e-jigar

parda meri ankh mein shayad ke hai kamkhwab ka

lag gai ag atish-e-rukh se naqab-e-yar mein

dekh lo jalta hai kona chadar-e-mahtab ka

majlis-e-be shama wo hain shama be majlis hun main

gham mira ahbab ko hai mujh ko gham ahbab ka

hijr janan ke alam mein ham farishte ban gae

dhyan muddat se chhuta ab-e-taam-o-khwab ka

ahl-e-taslim-o-raza se sar bulandon ki hai zeb

khush numa zer-e-manar-o-qurb hai mehrab ka

jhuk ke ham ne bosa-e-abru ki jab mangi dua

halqa-e-aghosh par alam hua mehrab ka

is qadar fariyad mahshar khez ai bulbul na kar

dekhna takhta na ulte gulshan-e-shadab ka

mehr dast awez gham hai har bashar ka dagh-e-gham

dil hai mahzar sohbat-e-gum karda-e-ahbab ka

be takalluf a gaya wo mah-e-dam fikr-e-sukhan

rah gaya pas-e-adab se qafiya adab ka

parwarish taqdir karti hai mujhe bahr-e-qaza

zabh ko parwarda karna kam hai qassab ka

nasha jurat ziyada ho gaya ai mai kasho

saghar-e-mai ban gaya kasa sar-e-sohrab ka

mu-e-atish did san bal khae wo mu-e-kamar

main jo likhun garm mazmun is tilai dab ka

ho gaya hun main naqab-e-ru-e-raushan par faqir

chahiye tah band mujh ko chadar-e-mahtab ka

khal-o-khat se aib us ke ru-e-aqdas ko nahin

husn hai mushaf mein hona nuqta-e-erab ka

dost dushman se ziyada tez rakhte hain chhuri

barahman bhi pesha ab karne lage qassab ka

hont par angusht rangin rakh ke wo kahne lage

shakh-e-marjan ne samar paida kiya unnab ka

laghari ke sath betabi yahi ai bahr-e-husn

khar hai ye jism-e-laghar mahi-e-be ab ka

teri furqat mein jo ae bhul kar ankhon mein nind

marduman chashm ne phir munh na dekha khwab ka

mere murgh-e-dil ki betabi urai kis tarah

hausla aisa nahin hai tair-e-simab ka

khidmat-e-aqdas mein chal kar ye ghazal parh ai munir

shohra sab ahl-e-sukhan mein hai tire nawwab ka