حق مجھے باطل آشنا نہ کرے

حق مجھے باطل آشنا نہ کرے

میں بتوں سے پھروں خدا نہ کرے

دوستی بد بلا ہے اس میں خدا

کسی دشمن کو مبتلا نہ کرے

ہے وہ مقتول کافر نعمت

اپنے قاتل کو جو دعا نہ کرے

رو مرے کو خدا قیامت تک

پشت پا سے تری جدا نہ کرے

ناصحو یہ بھی کچھ نصیحت ہے

کہ یقیںؔ یار سے وفا نہ کرے

haq mujhe batil ashna na kare

main buton se phirun khuda na kare

dosti bad bala hai is mein khuda

kisi dushman ko mubtala na kare

hai wo maqtul kafir-e-nemat

apne qatil ko jo dua na kare

ro mire ko khuda qayamat tak

pusht-e-pa se tiri juda na kare

naseho ye bhi kuchh nasihat hai

ke yaqin yar se wafa na kare