حق و ناحق جلانا ہو کسی کو تو جلا دینا

حق و ناحق جلانا ہو کسی کو تو جلا دینا

کوئی روئے تمہارے سامنے تم مسکرا دینا

تردد برق ریزوں میں تمہیں کرنے کی کیا حاجت

تمہیں کافی ہے ہنستا دیکھ لینا مسکرا دینا

دلوں پر بجلیاں گرنے کی صورت گر کوئی پوچھے

تو میں کہہ دوں تمہارا دیکھ لینا مسکرا دینا

ہوئی بجلی سے کس دن نقل انداز ستم گاری

تمہاری طرح سیکھا لاکھ اس نے مسکرا دینا

ستم گاری کی تعلیمیں انہیں دی ہیں یہ کہہ کہہ کر

کہ روتا جس کسی کو دیکھ لینا مسکرا دینا

تکلف بر طرف کیوں پھول لے کر آؤ تربت پر

مگر جب فاتحہ کو ہاتھ اٹھانا مسکرا دینا

نہ کیوں ہم انقلاب دہر کو مانیں اگر دیکھیں

گلوں کا نالہ کرنا بلبلوں کا مسکرا دینا

نہ جانا ناتوانی پر کہ اب بھی سعئ ناخن سے

دکھا سکتے ہیں ہم زخم کہن کا مسکرا دینا

تمہارے نام میں کیا زعفراں کی شاخ ہے سائلؔ

کہ جو سنتا ہے اس کو اس کو سن کر مسکرا دینا

haq-o-nahaq jalana ho kisi ko to jala dena

koi roe tumhare samne tum muskura dena

taraddud barq rezon mein tumhen karne ki kya hajat

tumhen kafi hai hansta dekh lena muskura dena

dilon par bijliyan girne ki surat gar koi puchhe

to main kah dun tumhara dekh lena muskura dena

hui bijli se kis din naql andaz-e-sitam gari

tumhari tarah sikha lakh us ne muskura dena

sitam gari ki taalimen unhen di hain ye kah kah kar

ke rota jis kisi ko dekh lena muskura dena

takalluf bar taraf kyun phul le kar ao turbat par

magar jab fatiha ko hath uthana muskura dena

na kyun ham inqilab-e-dahr ko manen agar dekhen

gulon ka nala karna bulbulon ka muskura dena

na jana natawani par ke ab bhi sai-e-nakhun se

dikha sakte hain ham zakhm-e-kuhan ka muskura dena

tumhare nam mein kya zaafran ki shakh hai sail

ke jo sunta hai us ko us ko sun kar muskura dena