آؤ اب مل کے گلستاں کو گلستاں کر دیں

آؤ اب مل کے گلستاں کو گلستاں کر دیں

ہر گل و لالہ کو رقصاں و غزل خواں کر دیں

عقل ہے فتنۂ بیدار سلا دیں اس کو

عشق کی جنس گراں مایہ کو ارزاں کر دیں

دست وحشت میں یہ اپنا ہی گریباں کب تک

ختم اب سلسلۂ چاک گریباں کر دیں

خون آدم پہ کوئی حرف نہ آنے پائے

جنہیں انساں نہیں کہتے انہیں انساں کر دیں

دامن خاک پہ یہ خون کے چھینٹے کب تک

انہیں چھینٹوں کو بہشت گل و ریحاں کر دیں

ماہ و انجم بھی ہوں شرمندۂ تنویر مجازؔ

دشت ظلمات میں اک ایسا چراغاں کر دیں

ao ab mil ke gulistan ko gulistan kar den

har gul-o-lala ko raqsan-o-ghazal khwan kar den

aql hai fitna-e-bedar sula den us ko

ishq ki jins-e-giran maya ko arzan kar den

dast-e-wahshat mein ye apna hi gareban kab tak

khatm ab silsila-e-chak-e-gareban kar den

khun-e-adam pe koi harf na ane pae

jinhen insan nahin kahte unhen insan kar den

daman-e-khak pe ye khun ke chhinte kab tak

unhen chhinton ko bahisht-e-gul-o-raihan kar den

mah-o-anjum bhi hun sharminda-e-tanwir majaz

dasht-e-zulmat mein ik aisa charaghan kar den