حقیقت محرم اسرار سے پوچھ

حقیقت محرم اسرار سے پوچھ

مزا انگور کا مے خوار سے پوچھ

وفا اغیار کی اغیار سے سن

مری الفت در و دیوار سے پوچھ

ہماری آہ بے تاثیر کا حال

کچھ اپنے دل سے کچھ اغیار سے پوچھ

دلوں میں ڈالنا ذوق اسیری

کمند گیسوئے خم دار سے پوچھ

دل مہجور سے سن لذت وصل

نشاط عافیت بیمار سے پوچھ

نہیں جز گریۂ غم حاصل عشق

ہماری چشم دریا بار سے پوچھ

نہیں آب بقا جز جلوۂ دوست

کسی لب تشنۂ دیدار سے پوچھ

فریب وعدۂ دل دار کی قدر

شہید خنجر انکار سے پوچھ

فغان شوق کو مانع نہیں وصل

یہ نکتہ عندلیب زار سے پوچھ

تصور میں کیا کرتے ہیں جو ہم

وہ تصویر خیال یار سے پوچھ

متاع بے بہا ہے شعر حالیؔ

مری قیمت مری گفتار سے پوچھ

haqiqat mahram-e-asrar se puchh

maza angur ka mai khwar se puchh

wafa aghyar ki aghyar se sun

miri ulfat dar-o-diwar se puchh

hamari ah be tasir ka hal

kuchh apne dil se kuchh aghyar se puchh

dilon mein dalna zauq-e-asiri

kamand-e-gesu-e-kham dar se puchh

dil-e-mahjur se sun lazzat-e-wasl

nishat-e-afiyat bimar se puchh

nahin juz girya-e-gham hasil-e-ishq

hamari chashm-e-dariya bar se puchh

nahin ab-e-baqa juz jalwa-e-dost

kisi lab tishna-e-didar se puchh

fareb-e-waada-e-dil dar ki qadar

shahid-e-khanjar-e-inkar se puchh

fughan-e-shauq ko mane nahin wasl

ye nukta andalib-e-zar se puchh

tasawwur mein kiya karte hain jo ham

wo taswir khayal-e-yar se puchh

mata-e-be baha hai sher hali

miri qimat miri guftar se puchh