حق وفا کے جو ہم جتانے لگے

حق وفا کے جو ہم جتانے لگے

آپ کچھ کہہ کے مسکرانے لگے

تھا یہاں دل میں طعن وصل عدو

عذر ان کی زباں پہ آنے لگے

ہم کو جینا پڑے گا فرقت میں

وہ اگر ہمت آزمانے لگے

ڈر ہے میری زباں نہ کھل جائے

اب وہ باتیں بہت بنانے لگے

جان بچتی نظر نہیں آتی

غیر الفت بہت جتانے لگے

تم کو کرنا پڑے گا عذر جفا

ہم اگر درد دل سنانے لگے

سخت مشکل ہے شیوۂ تسلیم

ہم بھی آخر کو جی چرانے لگے

جی میں ہے لوں رضائے پیر مغاں

قافلے پھر حرم کو جانے لگے

سر باطن کو فاش کر یا رب

اہل ظاہر بہت ستانے لگے

وقت رخصت تھا سخت حالیؔ پر

ہم بھی بیٹھے تھے جب وہ جانے لگے

haq wafa ke jo ham jatane lage

ap kuchh kah ke muskurane lage

tha yahan dil mein taan wasl-e-adu

uzr un ki zaban pe ane lage

ham ko jina parega furqat mein

wo agar himmat azmane lage

dar hai meri zaban na khul jae

ab wo baten bahut banane lage

jan bachti nazar nahin ati

ghair ulfat bahut jatane lage

tum ko karna parega uzr-e-jafa

ham agar dard-e-dil sunane lage

sakht mushkil hai shewa-e-taslim

ham bhi akhir ko ji churane lage

ji mein hai lun raza-e-pir-e-mughan

qafile phir haram ko jane lage

sar-e-batin ko fash kar ya rab

ahl-e-zahir bahut satane lage

waqt-e-rukhsat tha sakht hali par

ham bhi baithe the jab wo jane lage