آلام روزگار کو آساں بنا دیا

آلام روزگار کو آساں بنا دیا

جو غم ہوا اسے غم جاناں بنا دیا

میں کامیاب دید بھی محروم دید بھی

جلووں کے اژدہام نے حیراں بنا دیا

یوں مسکرائے جان سی کلیوں میں پڑ گئی

یوں لب کشا ہوئے کہ گلستاں بنا دیا

کچھ شورشوں کی نذر ہوا خون عاشقاں

کچھ جم کے رہ گیا اسے حرماں بنا دیا

اے شیخ وہ بسیط حقیقت ہے کفر کی

کچھ قید رسم نے جسے ایماں بنا دیا

کچھ آگ دی ہوس میں تو تعمیر عشق کی

جب خاک کر دیا اسے عرفاں بنا دیا

کیا کیا قیود دہر میں ہیں اہل ہوش کے

ایسی فضائے صاف کو زنداں بنا دیا

اک برق تھی ضمیر میں فطرت کے موجزن

آج اس کو حسن و عشق کا ساماں بنا دیا

مجبورئ حیات میں راز حیات ہے

زنداں کو میں نے روزن زنداں بنا دیا

وہ شورشیں نظام جہاں جن کے دم سے ہے

جب مختصر کیا انہیں انساں بنا دیا

ہم اس نگاہ ناز کو سمجھے تھے نیشتر

تم نے تو مسکرا کے رگ جاں بنا دیا

بلبل بہ آہ و نالہ و گل مست رنگ و بو

مجھ کو شہید رسم گلستاں بنا دیا

کہتے ہیں اک فریب مسلسل ہے زندگی

اس کو بھی وقف حسرت و حرماں بنا دیا

عالم سے بے خبر بھی ہوں عالم میں بھی ہوں میں

ساقی نے اس مقام کو آساں بنا دیا

اس حسن کاروبار کو مستوں سے پوچھئے

جس کو فریب ہوش نے عصیاں بنا دیا

alam-e-rozgar ko asan bana diya

jo gham hua use gham-e-janan bana diya

main kamyab did bhi mahrum-e-did bhi

jalwon ke azhdaham ne hairan bana diya

yun muskurae jan si kaliyon mein par gai

yun lab kusha hue ke gulistan bana diya

kuchh shorishon ki nazr hua khun-e-ashiqan

kuchh jam ke rah gaya use hirman bana diya

ai shaikh wo basit haqiqat hai kufr ki

kuchh qaid rasm ne jise iman bana diya

kuchh ag di hawas mein to taamir ishq ki

jab khak kar diya use irfan bana diya

kya kya quyud-e-dahr mein hain ahl-e-hosh ke

aisi faza-e-saf ko zindan bana diya

ik barq thi zamir mein fitrat ke maujzan

aj us ko husn-o-ishq ka saman bana diya

majburi-e-hayat mein raz-e-hayat hai

zindan ko main ne rauzan-e-zindan bana diya

wo shorishen nizam-e-jahan jin ke dam se hai

jab mukhtasar kiya unhen insan bana diya

ham us nigah-e-naz ko samjhe the neshtar

tum ne to muskura ke rag-e-jan bana diya

bulbul ba ah-o-nala-o-gul mast rang-o-bu

mujh ko shahid-e-rasm-e-gulistan bana diya

kahte hain ik fareb-e-musalsal hai zindagi

us ko bhi waqf-e-hasrat-o-hirman bana diya

alam se be khabar bhi hun alam mein bhi hun main

saqi ne us maqam ko asan bana diya

us husn karobar ko maston se puchhiye

jis ko fareb-e-hosh ne isyan bana diya