خوں بہانے کا بہانہ ہے بھلا میرے بعد

خوں بہانے کا بہانہ ہے بھلا میرے بعد

تین دن پان بھی کھانا نہ ذرا میرے بعد

فاتحہ پڑھ کے وہ رونے جو لگا میرے بعد

شور محشر مرے مدفن پہ اٹھا میرے بعد

سامنا ہوتے ہی یارو وہ برا مانتا ہے

میرا احوال کہو اس سے بھلا میرے بعد

دل احباب نہ مدفن پہ جلا مثل چراغ

پھر گئی ایسی زمانے کی ہوا میرے بعد

قبر کو تکیۂ آغوش بنا کر بیٹھا

میرے قاتل کا کہیں دل نہ لگا میرے بعد

کارواں میں پس و پیش ایک ہے منزل سب کی

ہو گئی رحلت ہر شاہ و گدا میرے بعد

ٹکڑے ہوگا میرے غم میں سر ساغر ساقی

کاٹ ڈالے گی صراحی بھی گلا میرے بعد

نہ رہا بلبل و پروانہ کو عشق گل و شمع

نام کو بھی کوئی عاشق نہ رہا میرے بعد

اے پری زاد تو دیوانہ ہے رسوا ہوگا

زاد دل غیر سے کہنا نہ سنا میرے بعد

اس سا معشوق جہاں میں کوئی مجھ سا عاشق

عرشؔ آگے نہ ہوا تھا نہ ہوا میرے بعد

khun bahane ka bahana hai bhala mere baad

tin din pan bhi khana na zara mere baad

fatiha parh ke wo rone jo laga mere baad

shor-e-mahshar mire madfan pe utha mere baad

samna hote hi yaro wo bura manta hai

mera ahwal kaho us se bhala mere baad

dil-e-ahbab na madfan pe jala misl-e-charagh

phir gai aisi zamane ki hawa mere baad

qabr ko takiya-e-aghosh bana kar baitha

mere qatil ka kahin dil na laga mere baad

karwan mein pas-o-pesh ek hai manzil sab ki

ho gai rehlat har shah-o-gada mere baad

tukre hoga mere gham mein sar saghar saqi

kat dalegi surahi bhi gila mere baad

na raha bulbul-o-parwana ko ishq-e-gul-o-shama

nam ko bhi koi ashiq na raha mere baad

ai pari zad to diwana hai ruswa hoga

zad dil ghair se kahna na suna mere baad

is sa maashuq jahan mein koi mujh sa ashiq

arsh age na hua tha na hua mere baad