خودی کا نشہ چڑھا آپ میں رہا نہ گیا — یاس یگانہ چنگیزی (Yaas Yagana Changezi)

خودی کا نشہ چڑھا آپ میں رہا نہ گیا

خدا بنے تھے یگانہؔ مگر بنا نہ گیا

پیام زیر لب ایسا کہ کچھ سنا نہ گیا

اشارہ پاتے ہی انگڑائی لی رہا نہ گیا

ہنسی میں وعدۂ فردا کو ٹالنے والو

لو دیکھ لو وہی کل آج بن کے آ نہ گیا

گناہ زندہ دلی کہیے یا دل آزاری

کسی پہ ہنس لیے اتنا کہ پھر ہنسا نہ گیا

پکارتا رہا کس کس کو ڈوبنے والا

خدا تھے اتنے مگر کوئی آڑے آ نہ گیا

سمجھتے کیا تھے مگر سنتے تھے ترانۂ درد

سمجھ میں آنے لگا جب تو پھر سنا نہ گیا

کروں تو کس سے کروں درد نارسا کا گلہ

کہ مجھ کو لے کے دل دوست میں سما نہ گیا

بتوں کو دیکھ کے سب نے خدا کو پہچانا

خدا کے گھر تو کوئی بندۂ خدا نہ گیا

کرشن کا ہوں پجاری علی کا بندہ ہوں

یگانہؔ شان خدا دیکھ کر رہا نہ گیا