خون کس کس کا ہوا صدقے تری تلوار پر

خون کس کس کا ہوا صدقے تری تلوار پر

فصل گل دھبے ہیں لاکھوں دامن گلزار پر

اب رہا دل تا قیامت ابروے خم دار پر

کیا ہٹے گا وہ جو گردن رکھ چکا تلوار پر

فصل گل رخصت ہوئی رو لیجئے گلزار پر

بس یہی دو تین پنکھڑیاں ہیں یا دو چار پر

وصل فرقت کی شبیں دونوں میں نیند آتی نہیں

ہنس رہا ہوں رو رہا ہوں طالع بیدار پر

انتہا پر عشق آ کر ہو گیا ہے عین حسن

موت کی بھی آنکھ پڑتی ہے ترے بیمار پر

وصل سے مایوس ہو کر کام میرا بن گیا

سیکڑوں اقرار صدقے ہو گئے انکار پر

میں نہیں لاکھوں پڑے ہیں مڑ کے پیچھے دیکھیے

نقش پا غش کھا گئے ہیں شوخیٔ رفتار پر

داغ والوں کے نشیمن شب کو بھی چھپتے نہیں

دھوپ سی پھیلی ہوئی ہے باغ کی دیوار پر

گردنیں وہ خم کئے ہیں جن کے سر ہیں بار خوں

تو اگر خودبیں نہیں ڈال اک نظر تلوار پر

اشک ریزان چمن سے خندۂ گل دب گیا

اوس پڑتی ہے نئی ہر شب سر گلزار پر

ایک اک رگ دے رہی ہے لو وفور سوز سے

ناز ہے ثاقبؔ کو اپنے خلعت زر تار پر

khun kis kis ka hua sadqe tiri talwar par

fasl-e-gul dhabbe hain lakhon daman-e-gulzar par

ab raha dil ta qayamat abrwe kham-e-dar par

kya hatega wo jo gardan rakh chuka talwar par

fasl-e-gul rukhsat hui ro lijiye gulzar par

bas yahi do tin pankhuriyan hain ya do char par

wasl furqat ki shaben donon mein nind ati nahin

hans raha hun ro raha hun tale-e-bedar par

intiha par ishq a kar ho gaya hai ain-e-husn

maut ki bhi ankh parti hai tire bimar par

wasl se mayus ho kar kam mera ban gaya

saikron iqrar sadqe ho gae inkar par

main nahin lakhon pare hain mur ke pichhe dekhiye

naqsh-e-pa ghash kha gae hain shokhi-e-raftar par

dagh walon ke nasheman shab ko bhi chhupte nahin

dhup si phaili hui hai bagh ki diwar par

gardanen wo kham kiye hain jin ke sar hain bar-e-khun

tu agar khudbin nahin dal ik nazar talwar par

ashk rezan chaman se khanda-e-gul dab gaya

os parti hai nai har shab-e-sar gulzar par

ek ik rag de rahi hai lo wafur-e-soz se

naz hai saqib ko apne khilat-e-zar tar par