جگر کو دیکھ کے زخم جگر کو دیکھتے ہیں

جگر کو دیکھ کے زخم جگر کو دیکھتے ہیں

مرے عزیز مرے چارہ گر کو دیکھتے ہیں

پڑی ہے سامنے جیسے کسی عزیز کی لاش

ہم اس نظر سے دل بے خبر کو دیکھتے ہیں

کٹیں گی موت کے ہاتھوں یہ بیڑیاں اک دن

اس ایک آس کو اور عمر بھر کو دیکھتے ہیں

گزر رہی ہے اسیران بدنصیب کی یوں

کبھی قفس کو کبھی بال و پر کو دیکھتے ہیں

پھر آ کے حسرتیں دم توڑتی ہیں خواب میں کیا

اداس دل جو ہم اتنا سحر کو دیکھتے ہیں

ستم کشوں کو یہ کیا خوب چپ کی داد ملی

جب آنکھ کھلتی ہے تربت سے گھر کو دیکھتے ہیں

اجل کو دیکھ کے سوجھا مآل ہستی کا

سحر کو دیکھ کے شمع سحر کو دیکھتے ہیں

کھلا ہے اب کے ہے ہستی کا ایک نام گناہ

تباہ حالی اہل ہنر کو دیکھتے ہیں

پہنچ کے منزل ہستی پہ ہوش اڑے بیخودؔ

کہ راہزن تھا جو اب راہبر کو دیکھتے ہیں

jigar ko dekh ke zakhm-e-jigar ko dekhte hain

mire aziz mire chara gar ko dekhte hain

pari hai samne jaise kisi aziz ki lash

ham is nazar se dil-e-be khabar ko dekhte hain

katengi maut ke hathon ye beriyan ik din

us ek as ko aur umr bhar ko dekhte hain

guzar rahi hai asiran-e-badnasib ki yun

kabhi qafas ko kabhi bal-o-par ko dekhte hain

phir a ke hasraten dam torti hain khwab mein kya

udas dil jo ham itna sahar ko dekhte hain

sitam kashon ko ye kya khub chup ki dad mili

jab ankh khulti hai turbat se ghar ko dekhte hain

ajal ko dekh ke sujha maal-e-hasti ka

sahar ko dekh ke sham-e-sahar ko dekhte hain

khula hai ab ke hai hasti ka ek nam gunah

tabah hali ahl-e-hunar ko dekhte hain

pahunch ke manzil-e-hasti pe hosh ure bekhud

ke rahzan tha jo ab rahbar ko dekhte hain