جھوٹے وعدوں پر تمہاری جائیں کیا

جھوٹے وعدوں پر تمہاری جائیں کیا

جانتے ہیں تم کو دھوکا کھائیں کیا

پرسش اپنے قتل کی ہونے لگی

داور محشر کو ہم بتلائیں کیا

ان کی محفل حیرت عالم سہی

غیر ہم پہلو جہاں ہو جائیں کیا

خون دل کھانے سے کچھ انکار ہے

جب نہیں اے لذت غم کھائیں کیا

ناصح مشفق کو سمجھانا پڑا

اس سمجھ پر تم کو وہ سمجھائیں کیا

غیر نے رہ کر جہنم کر دیا

ہیں مسلماں تیرے گھر ہم آئیں کیا

ہم سے ان سے بات کیا باقی رہی

ہم کہیں کیا اور وہ فرمائیں کیا

ہے پشیمانی میں اقرار خطا

قتل کر کے مجھ کو وہ پچھتائیں کیا

آئیں گے پھر بھی وہی عشرت کے دن

انقلاب دہر سے گھبرائیں کیا

مر ہی کر اٹھیں گے تیرے در سے ہم

آ کے جب بیٹھے تو پھر اٹھ جائیں کیا

دل کو کھوئے ایک مدت ہو گئی

اے اثرؔ اب ڈھونڈنے سے پائیں کیا

jhute waadon par tumhari jaen kya

jante hain tum ko dhoka khaen kya

pursish apne qatl ki hone lagi

dawar-e-mahshar ko ham batlaen kya

un ki mahfil hairat-e-alam sahi

ghair ham pahlu jahan ho jaen kya

khun-e-dil khane se kuchh inkar hai

jab nahin ai lazzat-e-gham khaen kya

naseh-e-mushfiq ko samjhana para

is samajh par tum ko wo samjhaen kya

ghair ne rah kar jahannam kar diya

hain musalman tere ghar ham aen kya

ham se un se bat kya baqi rahi

ham kahen kya aur wo farmaen kiya

hai pashemani mein iqrar-e-khata

qatl kar ke mujh ko wo pachhtaen kya

aenge phir bhi wahi ishrat ke din

inqilab-e-dahr se ghabraen kya

mar hi kar uthenge tere dar se ham

a ke jab baithe to phir uth jaen kya

dil ko khoe ek muddat ho gai

ai asar ab dhundne se paen kya