جھمکے دکھا کے طور کو جن نے جلا دیا

جھمکے دکھا کے طور کو جن نے جلا دیا

آئی قیامت ان نے جو پردہ اٹھا دیا

اس فتنے کو جگا کے پشیماں ہوئی نسیم

کیا کیا عزیز لوگوں کو ان نے سلا دیا

اب بھی دماغ رفتہ ہمارا ہے عرش پر

گو آسماں نے خاک میں ہم کو ملا دیا

جانی نہ قدر اس گہر شب چراغ کی

دل ریزۂ خزف کی طرح میں اٹھا دیا

تقصیر جان دینے میں ہم نے کبھو نہ کی

جب تیغ وہ بلند ہوئی سر جھکا دیا

گرمی چراغ کی سی نہیں وہ مزاج میں

اب دل فسردگی سے ہوں جیسے بجھا دیا

وہ آگ ہو رہا ہے خدا جانے غیر نے

میری طرف سے اس کے تئیں کیا لگا دیا

اتنا کہا تھا فرش تری رہ کے ہم ہوں کاش

سو تو نے مار مار کے آ کر بچھا دیا

اب گھٹتے گھٹتے جان میں طاقت نہیں رہی

ٹک لگ چلی صبا کہ دیا سا بڑھا دیا

تنگی لگا ہے کرنے دم اپنا بھی ہر گھڑی

کڑھنے نے دل کے جی کو ہمارے کھپا دیا

کی چشم تو نے باز کہ کھولا در ستم

کس مدعی خلق نے تجھ کو جگا دیا

کیا کیا زیان میرؔ نے کھینچے ہیں عشق میں

دل ہاتھ سے دیا ہے جدا سر جدا دیا

jhamke dikha ke tur ko jin ne jala diya

ai qayamat un ne jo parda utha diya

is fitne ko jaga ke pasheman hui nasim

kya kya aziz logon ko un ne sula diya

ab bhi dimagh rafta hamara hai arsh par

go asman ne khak mein ham ko mila diya

jani na qadr is guhar-e-shab charagh ki

dil reza-e-khazaf ki tarah main utha diya

taqsir jan dene mein ham ne kabhu na ki

jab tegh wo buland hui sar jhuka diya

garmi charagh ki si nahin wo mizaj mein

ab dil fasurdagi se hun jaise bujha diya

wo ag ho raha hai khuda jane ghair ne

meri taraf se us ke tain kya laga diya

itna kaha tha farsh tiri rah ke ham hun kash

so tu ne mar mar ke a kar bichha diya

ab ghatte ghatte jan mein taqat nahin rahi

tuk lag chali saba ke diya sa barha diya

tangi laga hai karne dam apna bhi har ghari

karhne ne dil ke ji ko hamare khapa diya

ki chashm tu ne baz ke khola dar-e-sitam

kis muddai-e-khalq ne tujh ko jaga diya

kya kya ziin mir ne khinche hain ishq mein

dil hath se diya hai juda sar juda diya