جوشش اشک سے ہوں آٹھ پہر پانی میں

جوشش اشک سے ہوں آٹھ پہر پانی میں

گرچہ ہوتے ہیں بہت خوف و خطر پانی میں

ضبط گریہ نے جلایا ہے درونہ سارا

دل اچنبھا ہے کہ ہے سوختہ تر پانی میں

آب شمشیر قیامت ہے برندہ اس کی

یہ گوارائی نہیں پاتے ہیں ہر پانی میں

طبع دریا جو ہو آشفتہ تو پھر طوفاں ہے

آہ بالوں کو پراگندہ نہ کر پانی میں

غرق آب اشک سے ہوں لیک اڑا جاتا ہوں

جوں سمک گو کہ مرے ڈوبے ہیں پر پانی میں

مردم دیدۂ تر مردم آبی ہیں مگر

رہتے ہیں روز و شب و شام و سحر پانی میں

ہیئت آنکھوں کی نہیں وہ رہی روتے روتے

اب تو گرداب سے آتے ہیں نظر پانی میں

گریۂ شب سے بہت آنکھ ڈرے ہے میری

پاؤں رکتے ہی نہیں بار دگر پانی میں

فرط گریہ سے ہوا میرؔ تباہ اپنا جہاز

تختہ پارے گئے کیا جانوں کدھر پانی میں

joshish-e-ashk se hun ath pahar pani mein

garche hote hain bahut khauf-o-khatar pani mein

zabt-e-girya ne jalaya hai darona sara

dil achambha hai ke hai sokhta tar pani mein

ab-e-shamshir-e-qayamat hai baranda us ki

ye gawarai nahin pate hain har pani mein

tab-e-dariya jo ho ashufta to phir tufan hai

ah balon ko paraganda na kar pani mein

gharq-e-ab-e-ashk se hun lek ura jata hun

jun samak go ke mire dube hain par pani mein

mardum-e-dida-e-tar mardum-e-abi hain magar

rahte hain roz-o-shab-o-sham-o-sahar pani mein

haiat ankhon ki nahin wo rahi rote rote

ab to girdab se ate hain nazar pani mein

girya-e-shab se bahut ankh dare hai meri

paon rukte hi nahin bar-e-digar pani mein

fart-e-girya se hua mir-e-tabah apna jahaz

takhta pare gae kya janun kidhar pani mein