جوں شمع دم صبح میں یاں سے سفری ہوں

جوں شمع دم صبح میں یاں سے سفری ہوں

ٹک منتظر جنبش باد سحری ہوں

نے گریۂ شب ہوں میں نہ آہ سحری ہوں

جوں بانگ جرس ہم نفس بے اثری ہوں

جاتا ہوں میں جیدھر کو وہ منہ پھیرے ہے مجھ سے

گویا کہ میں گرد قدم رہ گزری ہوں

دیکھا نہ میں جز سایۂ بازوئے شکستہ

حرماں زدہ جوں حسرت بے بال و پری ہوں

میں پیرہن اپنے میں سماتا نہیں جوں گل

جس وقت سے آمادہ پئے جامہ دری ہوں

سو خضر سے کم حوصلہ واں جی سے گئے ہیں

جس دشت خطرناک کا میں رہ گزری ہوں

جوں سرد رکھا سنگ جفا سے مجھے آزاد

مرہون ترا جی سے میں اے بے ثمری ہوں

کیا کم ہوں سکندر سے اگر دیکھیے مجھ کو

آئینہ صفت مالک خشکی و تری ہوں

کس بزم میں دیکھی ہے وہ جھمکی کہ میں قائمؔ

جوں شمع سدا محو پریشاں نظری ہوں

jun shama dam-e-subh mein yan se safari hun

tuk muntazir-e-jumbish bad-e-sahari hun

ne girya-e-shab hun main na ah-e-sahari hun

jun bang-e-jaras ham nafas-e-be asari hun

jata hun main jidhar ko wo munh phere hai mujh se

goya ke main gard-e-qadam rah guzri hun

dekha na main juz saya-e-bazu-e-shikasta

hirman zada jun hasrat-e-be bal-o-pari hun

main pairahan apne mein samita nahin jun gul

jis waqt se amada piye jama dari hun

so khizr se kam hausla wan ji se gae hain

jis dasht khatarnak ka main rah guzri hun

jun sard rakha sang-e-jafa se mujhe azad

marhun tira ji se main ai be samri hun

kya kam hun sikandar se agar dekhiye mujh ko

aina sifat malik khushki-o-tiri hun

kis bazm mein dekhi hai wo jhamki ke main qaim

jun shama sada mahw-e-pareshan nazari hun