جڑاؤ چوڑیوں کے ہاتھوں میں پھبن کیا خوب

جڑاؤ چوڑیوں کے ہاتھوں میں پھبن کیا خوب

بھرے بھرے ترے بازو پہ نورتن کیا خوب

کھجوری چوٹی کے قربان واہ کیا کہنا

نثار پریوں کے مو بہ مو شکن کیا خوب

نئی جوانی کا جوش اور ابھار سینے کا

دوشالہ ڈھلکا ہوا سر سے بانکپن کیا خوب

عجب بہار ہے بیلوں کی اور بوٹوں کی

پری دوپٹا ترا غیرت چمن کیا خوب

ازار بند کے لچھے کا واہ رے عالم

گداز رانوں پہ پاجامے کی شکن کیا خوب

جو پہنا اچھا برا تو نے اترا بن بن کر

ہر ایک چیز میں جانی سجیلا پن کیا خوب

گلاب سے ترے گال اور آنکھیں نرگس سے

برنگ غنچۂ لالہ لب و دہن کیا خوب

نظر پھسلتے ہی واللہ میری آنکھوں میں خاک

کہ صاف صاف ہے آئینے سا بدن کیا خوب

خدا نے نور کے سانچے میں تجھ کو ڈھالا ہے

جو دیکھتا ہے وہ کہتا ہے یہ سخن کیا خوب

بیان حسن کرے تیرا بحرؔ کس منہ سے

ترا بناؤ ترے چھب تری پھبن کیا خوب

jurao chauriyon ke hathon mein phaban kiya khub

bhare bhare tire bazu pe nauratan kya khub

khajuri choti ke qurban wah kya kahna

nisar pariyon ke mu ba mu shikan kiya khub

nai jawani ka josh aur ubhar sine ka

doshala dhalka hua sar se bankpan kya khub

ajab bahar hai bilon ki aur buton ki

pari dopatta tira ghairat-e-chaman kya khub

izar band ke lachchhe ka wah re alam

gudaz ranon pe pajame ki shikan kiya khub

jo pahna achchha bura tu ne utra ban ban kar

har ek chiz mein jani sajila pan kiya khub

gulab se tire gal aur ankhen nargis se

barang-e-ghuncha-e-lala lab-o-dahan kiya khub

nazar phisalte hi wallah meri ankhon mein khak

ke saf saf hai aine sa badan kiya khub

khuda ne nur ke sanche mein tujh ko dhala hai

jo dekhta hai wo kahta hai ye sukhan kiya khub

bayan-e-husn kare tera bahr kis munh se

tira banao tire chhab tiri phaban kiya khub