جھوم کر آج جو متوالی گھٹا آئی ہے

جھوم کر آج جو متوالی گھٹا آئی ہے

یاد کیا کیا تری مستانہ ادا آئی ہے

ایسے نازک کبھی پابند حنا ہوتے ہیں

ہاتھ دھو ڈالے ہیں رنگت جو ذرا آئی ہے

تم بھی رخسار پہ زلفوں کو ذرا بکھرا دو

کالی کالی سر گلزار گھٹا آئی ہے

حسن اخلاق بھی ہے حسن جوانی کی طرح

جھک گئی ہیں تری آنکھیں جو حیا آئی ہے

ہائے وہ کھول کے جوڑا یہ کسی کا کہنا

آئیے سو رہیں اب رات سوا آئی ہے

سچ ہے تم نے جو لگایا نہیں منہ غنچوں کو

انہیں پھر کس کے تبسم کی ادا آئی ہے

کس کا دل خون نہیں ہے چمن عالم میں

پتی پتی سے ہمیں بوئے وفا آئی ہے

رات بھر گریۂ شبنم سے جو غنچے تھے اداس

صبح ہوتے ہی ہنسانے کو صبا آئی ہے

شعر خوانی پہ تری سب کو گماں ہے کہ جلیلؔ

بزم میں روح امیر الشعرا آئی ہے

jhum kar aj jo mutawali ghata ai hai

yad kya kya tiri mastana ada ai hai

aise nazuk kabhi paband-e-hina hote hain

hath dho dale hain rangat jo zara ai hai

tum bhi rukhsar pe zulfon ko zara bikhra do

kali kali sar-e-gulzar ghata ai hai

husn-e-akhlaq bhi hai husn-e-jawani ki tarah

jhuk gai hain tiri ankhen jo haya ai hai

hae wo khol ke jora ye kisi ka kahna

aiye so rahen ab rat siwa ai hai

sach hai tum ne jo lagaya nahin munh ghunchon ko

unhen phir kis ke tabassum ki ada ai hai

kis ka dil khun nahin hai chaman-e-alam mein

patti patti se hamen bu-e-wafa ai hai

rat bhar girya-e-shabnam se jo ghunche the udas

subh hote hi hansane ko saba ai hai

sher khwani pe tiri sab ko guman hai ke jalil

bazm mein ruh amir-e-alshshuara ai hai