حال انجام سے پیری میں خبردار ہوئے

حال انجام سے پیری میں خبردار ہوئے

حیف صد حیف کہ اب خواب سے بیدار ہوئے

کس طرح خانہ نشینی سے نہ گھبرا جائیں

آدمی ہم نہ ہوئے نقطۂ پرکار ہوئے

خانۂ چشم میں رکھا نہ بصارت نے قدم

بند جس دن سے ترے روزن دیوار ہوئے

ہے مرے پیش نظر اب بھی تمہارا بچپن

مجھ سے بتلاؤ کہ تم کب سے طرحدار ہوئے

نفع کیا پہونچے کسی کو جو تونگر ہو بخیل

کیا عنادل کو ملا پھول جو زردار ہوئے

پست ہمت ہوئی موسیٰ کی حقیقت سن کر

بھول کر ہم نہ کبھی طالب دیدار ہوئے

موقع دید جب آیا تو نگہ خیرہ ہوئی

مردم دیدہ عجب وقت میں بیمار ہوئے

شیشہ سے بن کے پری بنت عنب جب نکلی

دیکھ کر جامے سے باہر وہیں مے خوار ہوئے

وصل میں تلخیٔ فرقت کی تلافی یہ ہوئی

لب شیرین صنم مجھ سے شکر بار ہوئے

منتشر فکر معیشت سے ہوئے ہوش و حواس

طائر عقل رسا پر ترے بے کار ہوئے

حشر میں عیش کے ساماں ہوئے دشمن طالبؔ

یار غار اپنے جو دنیا میں تھے اغیار ہوئے

hal anjam se piri mein khabardar hue

haif sad haif ke ab khwab se bedar hue

kis tarah khana nashini se na ghabra jaen

admi ham na hue nuqta-e-parkar hue

khana-e-chashm mein rakha na basarat ne qadam

band jis din se tire rauzan-e-diwar hue

hai mire pesh-e-nazar ab bhi tumhara bachpan

mujh se batlao ke tum kab se tarhdar hue

nafa kya pahunche kisi ko jo tawangar ho bakhil

kya anadil ko mila phul jo zardar hue

past himmat hui musa ki haqiqat sun kar

bhul kar ham na kabhi talib-e-didar hue

mauqa-e-did jab aya to nigah khira hui

mardum-e-dida ajab waqt mein bimar hue

shisha se ban ke pari bint-e-amb jab nikli

dekh kar jame se bahar wahin mai khwar hue

wasl mein talkhi-e-furqat ki talafi ye hui

lab-e-sheryun sanam mujh se shakar bar hue

muntashir fikr-e-maishat se hue hosh-o-hawas

tair-e-aql-e-rasa par tire be kar hue

hashr mein aish ke saman hue dushman talib

yar-e-ghar apne jo duniya mein the aghyar hue