حال دل تم سے مری جاں نہ کہا کون سے دن

حال دل تم سے مری جاں نہ کہا کون سے دن

میرے کہنے کو بھلا تم نے سنا کون سے دن

لذتیں وصل کی کچھ میں نے بیاں کیں تو کہا

آپ کے واسطے دن ایسا ہوا کون سے دن

جب کہا میں نے وہ کیا دن تھے جو ملتے تھے تم

ہو کے انجان عجب ڈھب سے کہا کون سے دن

وصل کی شب ہے ملو آج تو دل کھول کے خوب

اے مری جان یہ جائے گی حیا کون سے دن

رشک آمیز جو کچھ میں نے کہا تو بولے

غیر کے ساتھ مجھے دیکھ لیا کون سے دن

ہر گھڑی دل میں رہا خوف بگڑ جانے کا

تیرے ملنے میں مزا ہم کو ملا کون سے دن

کون سا دن ہے جو بے چین نہیں ہو کے نظامؔ

بے قراری سے نہ اس در پہ گیا کون سے دن

hal-e-dil tum se miri jan na kaha kaun se din

mere kahne ko bhala tum ne suna kaun se din

lazzaten wasl ki kuchh main ne bayan kin to kaha

ap ke waste din aisa hua kaun se din

jab kaha main ne wo kya din the jo milte the tum

ho ke anjan ajab dhab se kaha kaun se din

wasl ki shab hai milo aj to dil khol ke khub

ai miri jan ye jaegi haya kaun se din

rashk amez jo kuchh main ne kaha to bole

ghair ke sath mujhe dekh liya kaun se din

har ghari dil mein raha khauf bigar jane ka

tere milne mein maza ham ko mila kaun se din

kaun sa din hai jo be chain nahin ho ke nizam

be qarari se na us dar pe gaya kaun se din