حالت تو دیکھ لی مری چشم پر آب کی

حالت تو دیکھ لی مری چشم پر آب کی

ساقی نہیں ہوس مجھے جام شراب کی

دل کو شرار شعلۂ غم نے جلا دیا

پہلو سے آ رہی ہے جو خوشبو کباب کی

کس کی شمیم نے اسے ایسا بسا دیا

آتی ہے اپنی خاک سے خوشبو گلاب کی

افسانۂ گذشتہ یہ کہتا ہے مجھ سے دل

کیا ذکر ان کا بھولیے باتیں ہیں خواب کی

اس بارگاہ احمد مرسل کے سامنے

وقعت نہیں ہے کچھ بھی فلک سے حباب کی

از فرش تا بہ عرش منور اسی سے ہے

ایسی چمک ہے روضۂ عالی جناب کی

کیوں کر نہ ہوں میں نغمہ سرا ان کی نعت میں

بلبل ہوں بوستان رسالت مآب کی

اس دہر بے بقا سے لگاؤں میں دل کو کیا

ہستی ہے ایک وسعت موج سراب کی

عزت نہ تیرے عرش پہ کیوں کر ملک کریں

تو ہے جمیلہؔ خاک قدم بو تراب کی

halat to dekh li miri chashm par ab ki

saqi nahin hawas mujhe jam-e-sharab ki

dil ko sharar shola-e-gham ne jala diya

pahlu se a rahi hai jo khushbu kabab ki

kis ki shamim ne use aisa basa diya

ati hai apni khak se khushbu gulab ki

afsana-e-guzishta ye kahta hai mujh se dil

kya zikr un ka bhuliye baten hain khwab ki

is bargah-e-ahmad-e-mursal ke samne

waqat nahin hai kuchh bhi falak se habab ki

az farsh ta ba arsh munawwar usi se hai

aisi chamak hai rauza-e-ali janab ki

kyun kar na hun main naghma sara un ki naat mein

bulbul hun bostan-e-risalat mab ki

is dahr be baqa se lagaun mein dil ko kya

hasti hai ek wusat-e-mauj-e-sarab ki

izzat na tere arsh pe kyun kar malak karen

tu hai jamilahu khak qadam bu turab ki