حال مرگ بے کسی سن کر اثر کوئی نہ ہو — حسن بریلوی

Arooz is now on the App Store, for iPhone and iPad. Download →

حسن بریلوی

حال مرگ بے کسی سن کر اثر کوئی نہ ہو

سچ تو یہ ہے آپ سا بھی بے خبر کوئی نہ ہو

ہائے دشمن دیکھیں ان کے اٹھتے جوبن کی بہار

ہائے میں کوئی نہ ہوں میری نظر کوئی نہ ہو

اس تمنا پر کٹے مرتے ہیں مشتاقان قتل

یار پر قربان ہم سے پیشتر کوئی نہ ہو

وہ قیامت کی گھڑی ہے طالب دیدار پر

جب اٹھے پردا تو پردے کے ادھر کوئی نہ ہو

عشق میں بے تابیاں ہوتی ہیں لیکن اے حسنؔ

جس قدر بے چین تم ہو اس قدر کوئی نہ ہو