جیتے جی بس وہ بت رہا ہم راہ — خواجہ محمد وزیر

Arooz is now on the App Store, for iPhone and iPad. Download →

خواجہ محمد وزیر

جیتے جی بس وہ بت رہا ہم راہ

اب تو بندے کے ہے خدا ہم راہ

دل دیا اس کو پر یہ ڈرتا ہوں

دشمن اک دوست کے کیا ہم راہ

نہیں یاران رفتگاں کا نشاں

لے گئے کیا یہ نقش پا ہم راہ

اس میں کیا آپ کی ہے رسوائی

رہے گر مجھ سا پارسا ہم راہ

تجھے دیکھا جدھر نگاہ گئی

تھا تصور زبس ترا ہم راہ

رنج تنہائی لحد نہ رہا

یار کے غم کو لے لیا ہم راہ

شب کو جاتے ہو ساتھ لو مشعل

کہیے تو ہو یہ دل جلا ہم راہ

ہوئے بعد اپنے بے وفا عشاق

لے گئے یاں سے ہم وفا ہم راہ

تیری رفتار کا میں کشتہ ہوں

قبر تک آئیو ذرا ہم راہ

یہ دل بد گماں نہ دیکھ سکے

اگر اس بت کے ہو خدا ہم راہ

تا سلامت تو آئے اے قاصد

ٹھہر اتنا کروں دعا ہم راہ

اس نے تنہا مجھے نہ جانے دیا

غم فرقت کو کر دیا ہم راہ

ناتواں ہے بہت غبار مرا

تو ذرا رہیو اے صبا ہم راہ

رہی یاں گردش اور جامہ دری

کاش لاتے نہ دست و پا ہم راہ

گالیاں جیسے دیں ہیں دل لے کر

جائے گا یہ دیا لیا ہم راہ

جا نہ تنہا تو اے شہ خوباں

ہو وزیرؔ برہنہ پا ہم راہ