حال دل اے بتو خدا جانے — واجد علی شاہ

Arooz is now on the App Store, for iPhone and iPad. Download →

واجد علی شاہ

حال دل اے بتو خدا جانے

سچ ہے سچ اس کو غیر کیا جانے

لطف اشعار پوچھ شاعر سے

بے وفائی وہ بے وفا جانے

پھوٹ کر محفلوں میں روتے ہو

دل کا احوال کوئی کیا جانے

سخت کوئی غزل میں پاتا ہوں

نازکی میرا دل ربا جانے

لاکھ میں فیصلہ چکاتے ہو

مدعی کیوں نہ مدعا جانے

مرض عشق میں اثر ہوگا

میرا ہر شعر وہ دوا جانے

آج بے ہوش ہو گیا اخترؔ

کیا ہوا کیا ہوا خدا جانے