حاصل علم بشر جہل کا عرفاں ہونا

حاصل علم بشر جہل کا عرفاں ہونا

عمر بھر عقل سے سیکھا کیے ناداں ہونا

چار زنجیر عناصر پہ ہے زنداں موقوف

وحشت عشق ذرا سلسلۂ جنباں ہونا

جمع کرتا ہوں گریباں کے نکالے ہوئے تار

یاد آیا ہے مجھے سر بہ گریباں ہونا

دل بس اک لرزش پیہم ہے سراپا یعنی

تیرے آئینہ کو آتا نہیں حیراں ہونا

فال افزدنی مشکل ہے ہر آسانی کار

میری مشکل کو مبارک نہیں آساں ہونا

راحت انجام غم اور راحت دنیا معلوم

لکھ دیا دل کے مقدر میں پریشاں ہونا

دے ترا حسن تغافل جسے ہے چاہے فریب

ورنہ تو اور جفاؤں پہ پشیماں ہونا

ہائے وہ جلوۂ ایمن وہ نگاہ سر طور

فتنہ ساماں سے ترا فتنۂ ساماں ہونا

خاک فانیؔ کی قسم ہے تجھے اے دشت جنوں

کس سے سیکھا ترے ذروں نے بیاباں ہونا

hasil-e-ilm bashar jahl ka irfan hona

umr bhar aql se sikha kiye nadan hona

char zanjir anasir pe hai zindan mauquf

wahshat-e-ishq zara silsila-e-jumban hona

jama karta hun gareban ke nikale hue tar

yad aya hai mujhe sar ba gareban hona

dil bas ik larzish-e-paiham hai sarapa yaani

tere aina ko ata nahin hairan hona

fal afzdini mushkil hai har asani kar

meri mushkil ko mubarak nahin asan hona

rahat anjam-e-gham aur rahat-e-duniya maalum

likh diya dil ke muqaddar mein pareshan hona

de tira husn-e-taghaful jise hai chahe fareb

warna to aur jafaon pe pasheman hona

hae wo jalwa-e-eman wo nigah-e-sar tur

fitna saman se tira fitna-e-saman hona

khak fani ki qasam hai tujhe ai dasht-e-junun

kis se sikha tire zarron ne bayaban hona