حباب آسا میں دم بھرتا ہوں تیری آشنائی کا

حباب آسا میں دم بھرتا ہوں تیری آشنائی کا

نہایت غم ہے اس قطرے کو دریا کی جدائی کا

اسیر اے دوست تیرے عاشق و معشوق دونوں ہیں

گرفتار آہنی زنجیر کا یہ وہ طلائی کا

تعلق روح سے مجھ کو جسد کا نا گوارا ہے

زمانے میں چلن ہے چار دن کی آشنائی کا

فراق یار میں مر مر کے آخر زندگانی کے

رہا صدمہ ہمیشہ روح و قالب کی جدائی کا

ہوئی منظور محتاجی نہ تجھ کو اپنی سائل کے

بنایا کاسۂ سر واژگوں کاسہ گدائی کا

نظر آتی ہیں ہر سو صورتیں ہی صورتیں مجھ کو

کوئی آئینہ خانہ کارخانہ ہے جدائی کا

وصال یار کا وعدہ ہے فردائے قیامت پر

یقیں مجھ کو نہیں ہے گور تک اپنی رسائی کا

بھروسہ آہ پر ہرگز نہیں اے یار عاشق کو

شکار اب تک کہیں دیکھا نہیں تیر ہوائی کا

دکھایا حسن سے اعجاز موسی کلک قدرت نے

ید بیضا بنایا چور انگشت حنائی کا

نہیں مٹتی ہے پتھر کی لکیر احباب کہتے ہیں

رہے گا پائے بت پر نقش اپنی جبہہ سائی کا

شکست خاطر احباب ہوتی ہے درست اس سے

توجہ میں تری اے یار اثر ہے مومیائی کا

دل اپنا آئینہ سے صاف عشق پاک رکھتا ہے

تماشا دیکھتا ہے حسن اس میں خود نمائی کا

کف افسوس ملواتی ہے تیری پاک دامانی

پنہا کر شاہد عصمت کو جامہ پارسائی کا

نہیں دیکھا ہے لیکن تجھ کو پہچانا ہے آتشؔ نے

بجا ہے اے صنم جو تجھ کو دعویٰ ہے خدائی کا

habab asa mein dam bharta hun teri ashnai ka

nihayat gham hai is qatre ko dariya ki judai ka

asir ai dost tere ashiq-o-maashuq donon hain

giraftar ahani zanjir ka ye wo tilai ka

taalluq ruh se mujh ko jasad ka na gawara hai

zamane mein chalan hai char din ki ashnai ka

firaq-e-yar mein mar mar ke akhir zindagani ke

raha sadma hamesha ruh-o-qalib ki judai ka

hui manzur mohtaji na tujh ko apni sail ke

banaya kasa-e-sar wazhgon kasa gadai ka

nazar ati hain har su suraten hi suraten mujh ko

koi aina khana karkhana hai judai ka

wisal-e-yar ka waada hai farda-e-qayamat par

yaqin mujh ko nahin hai gor tak apni rasai ka

bharosa ah par hargiz nahin ai yar ashiq ko

shikar ab tak kahin dekha nahin tir-e-hawai ka

dikhaya husn se ejaz-e-musa kilk-e-qudrat ne

yad-e-baiza banaya chur angishat-e-hinai ka

nahin mitti hai patthar ki lakir ahbab kahte hain

rahega pae but par naqsh apni jabha sai ka

shikast-e-khatir-e-ahbab hoti hai durust us se

tawajjoh mein tiri ai yar asar hai momiyai ka

dil apna aina se saf ishq-e-pak rakhta hai

tamasha dekhta hai husn is mein khud numai ka

kaf-e-afsos malwati hai teri pak damani

panha kar shahid-e-ismat ko jama parsai ka

nahin dekha hai lekin tujh ko pahchana hai atish ne

baja hai ai sanam jo tujh ko daawa hai khudai ka