حجاب گنج مخفی میں نہاں تھے

حجاب گنج مخفی میں نہاں تھے

الٰہی ہم کہاں آئے کہاں تھے

کسی نے بھی نہ دیکھا ہم جہاں تھے

بدن تھے خلق ہم مانند جاں تھے

بسان نالہ سر کھینچا ہے باہر

ہم اہل درد کے دل میں نہاں تھے

نکالا کرتے تھے بالوں کی کھالیں

کبھی ہم بھی خیال شاعراں تھے

رہے رستے میں قدموں سے چپٹ کر

مگر ہم نقش پائے رفتگاں تھے

جب اس کوچے کی حاصل تھی گدائی

خداوند زمین و آسماں تھے

ہوئے ظاہر بسان نور باطن

دل ارباب دل میں ہم نہاں تھے

ترے کوچے میں جب چلنا پڑا تھا

بسان اشک آنکھوں سے رواں تھے

کچھ ایسے نشۂ ہستی سے بہکے

نہیں جانا کہاں آئے کہاں تھے

سراپا درد تھے مانند دل ہم

مرض تھے پر نصیب دوستاں تھے

کہاں بات اس کی الفت کی کہاں دل

یہ درہم گنج مخفی میں نہاں تھے

نہ دوڑے جز سوائے کوچۂ یار

مگر ہم بھی خیال دوستاں تھے

نہ کیوں صیاد وقت مرگ آتا

کہ ہم باغ جہاں میں مرغ جاں تھے

نہ ہرگز بزم ساقی میں رکے ہم

مگر دور‌‌ شراب ارغواں تھے

حمائل تھے گلوئے دخت رز میں

کے ہم دست خیال میکشاں تھے

رہی راتوں کو اکثر سیر افلاک

مگر ہم تیر آہ بے کساں تھے

کہاں ڈالا خلل وصل عدوین

گجر ہی تھے نہ ہم بانگ اذاں تھے

بہار باغ ہستی تھی ہمیں سے

نظر سے گو برنگ بو نہاں تھے

عیاں ایسے کہ ہر شے میں نہاں ہم

نہاں ایسے کہ ہر شے سے عیاں تھے

نہ تھا معشوق جس میں غیر عاشق

عجب خلوت تھی وہ بھی ہم جہاں تھے

اٹھے ہم اٹھ گیا پردا دوئی کا

ہمارے اس کے بس ہم درمیاں تھے

چلیں زیر زمیں بے بال و پر آج

کبھی ہم طائر عرش آشیاں تھے

نہ شکر اس کا کیا تلوار کھا کر

کہ زخم اپنے دہان بے زباں تھے

کچھ ایسی تھی شب غم کی چڑھائی

کہ نالے شمع بزم لامکاں تھے

گئے وہ دن کہ ہر دم یہ جگر دل

لہو بن بن کے آنکھوں سے رواں تھے

نہ رہتے تھے ٹھکانے ایک ساعت

کبھی ہم بھی حواس عاشقاں تھے

گلستان جہاں میں کون ٹھہرا

جو سرو آئے نظر سرو رواں تھے

خدا نے ان کو پہنچایا ہدف تک

خدنگ آہ تیر بے کماں تھے

جو اس محفل میں ہم جانے بھی پائے

پیا پے آنسو آنکھوں سے رواں تھے

نہ نکلی بات منہ سے صور شمع

زبان ایسی تھی گویا بے زباں تھے

مرے پہلو میں کل بیٹھے تھے آسی

مگر جب تک تھے مثل دل تپاں تھے

hijab-e-ganj-e-makhfi mein nihan the

ilahi ham kahan ae kahan the

kisi ne bhi na dekha ham jahan the

badan the khalq ham manind jan the

basan-e-nala sar khincha hai bahar

ham ahl-e-dard ke dil mein nihan the

nikala karte the balon ki khalen

kabhi ham bhi khayal-e-shayaran the

rahe raste mein qadmon se chapat kar

magar ham naqsh pae raftagan the

jab us kuche ki hasil thi gadai

khudawand-e-zamin-o-asman the

hue zahir basan-e-nur-e-batin

dil-e-arbab-e-dil mein ham nihan the

tire kuche mein jab chalna para tha

basan-e-ashk ankhon se rawan the

kuchh aise nasha-e-hasti se bahke

nahin jana kahan ae kahan the

sarapa dard the manind-e-dil ham

maraz the par nasib-e-dostan the

kahan bat us ki ulfat ki kahan dil

ye dirham ganj-e-makhfi mein nihan the

na daure juz siwae kucha-e-yar

magar ham bhi khayal-e-dostan the

na kyun sayyad waqt-e-marg ata

ke ham bagh jahan mein murgh-e-jan the

na hargiz bazm-e-saqi mein ruke ham

magar daur-e-sharab arghawan the

hamail the galo-e-dukht-e-raz mein

ke ham dast khayal maikashan the

rahi raton ko aksar sair-e-aflak

magar ham tir ah-e-be kisan the

kahan dala khalal wasl-e-aduyun

gajar hi the na ham bang-e-azan the

bahar-e-bagh-e-hasti thi hamen se

nazar se go barang-e-bu nihan the

ayan aise ke har shai mein nihan ham

nihan aise ke har shai se ayan the

na tha maashuq jis mein ghair ashiq

ajab khalwat thi wo bhi ham jahan the

uthe ham uth gaya parda dui ka

hamare us ke bas ham darmiyan the

chalen zer-e-zamin be bal-o-par aj

kabhi ham tair-e-arsh-e-ashiyan the

na shukr us ka kiya talwar kha kar

ke zakhm apne dahan-e-be zaban the

kuchh aisi thi shab-e-gham ki charhai

ke nale sham-e-bazm-e-lamakan the

gae wo din ke har dam ye jigar dil

lahu ban ban ke ankhon se rawan the

na rahte the thikane ek saat

kabhi ham bhi hawas-e-ashiqan the

gulistan-e-jahan mein kaun thahra

jo sarw ae nazar sarw-e-rawan the

khuda ne un ko pahunchaya hadaf tak

khadang-e-ah tir-e-be kaman the

jo is mahfil mein ham jane bhi pae

piya pe ansu ankhon se rawan the

na nikli bat munh se sur-e-shama

zaban aisi thi goya be zaban the

mire pahlu mein kal baithe the asi

magar jab tak the misl-e-dil tapan the