حسن صورت میں گرچہ بود نہیں

حسن صورت میں گرچہ بود نہیں

پر کہاں عشق کی نمود نہیں

نیستی جلوہ گر ہے ہستی میں

کچھ عدم کا مرے وجود نہیں

ہم نے اول سے دیکھا آخر تک

ذات حق کی نبود و بود نہیں

تیرے حسن ملیح کے قربان

کس کے ورد زباں درود نہیں

میرے ساقی کے پیش ساغر چشم

شیشہ کو کب سر سجود نہیں

داغ سوزاں ہے جسم میں وہ عضو

سنگ آفت سے جو کبود نہیں

باغ ہے داغ گر نہ ہو لالہ

بزم وہ کیا ہے جس میں عود نہیں

بسکہ ہے کند ناخن مژگاں

عقدۂ اشک کی کشود نہیں

ہم جو کہتے تھے تم سے روز وقارؔ

جز ضرر عاشقی میں سود نہیں

husn surat mein garche bud nahin

par kahan ishq ki numud nahin

nisti jalwa gar hai hasti mein

kuchh adam ka mire wajud nahin

ham ne awwal se dekha akhir tak

zat-e-haq ki nabod-o-bud nahin

tere husn-e-malih ke qurban

kis ke wird-e-zaban durud nahin

mere saqi ke pesh-e-saghar-e-chashm

shisha ko kab sar-e-sujud nahin

dagh-e-sozan hai jism mein wo uzw

sang afat se jo kabud nahin

bagh hai dagh gar na ho lala

bazm wo kya hai jis mein ud nahin

baske hai kand nakhun-e-mizhgan

uqda-e-ashk ki kashud nahin

ham jo kahte the tum se roz waqar

juz zarar ashiqi mein sud nahin