حسن شہہ لولاک جو چمکا شب معراج

حسن شہہ لولاک جو چمکا شب معراج

جلووں سے نبی صبح تجلی شب معراج

کیا خوب جما وصل کا نقشہ شب معراج

مطلوب نیا طالب شیدا شب معراج

پایا نہ تقرب کسی مخلوق نے ایسا

جیسا کہ ملا شاہ کو رتبہ شب معراج

طالب تھا خدا بندۂ محبوب کا اپنے

مہمان خدا نور خدا تھا شب معراج

گنجینۂ رحمت سے حبیب ازلی کو

کیا کیا نہیں اللہ نے بخشا شب معراج

تا دیر رہی طالب و مطلوب میں قربت

دل بھر کے مزہ وصل کا لوٹا شب معراج

کانوں نے سنا جو کبھی کانوں نہ سنا تھا

آنکھوں نے نہ دیکھا تھا جو دیکھا شب معراج

عالم کو کیا مست مئے حسن ازل نے

بیکار رہا ساغر و مینا شب معراج

نعلین مبارک کا ہوا فخر جو حاصل

بس جھوم گیا عرش معلیٰ شب معراج

اللہ کا دیدار محمد کی شفاعت

مائلؔ کو ملی حشر کے دن یا شب معراج

husn-e-shah-e-laulak jo chamka shab meraj

jalwon se nabi subh tajalli shab-e-meraj

kya khub jama wasl ka naqsha shab-e-meraj

matlub naya talib-e-shaida shab meraj

paya na taqarrub kisi makhluq ne aisa

jaisa ke mila shah ko rutba shab-e-meraj

talib tha khuda banda-e-mahbub ka apne

mehman-e-khuda nur-e-khuda tha shab-e-meraj

ganjina-e-rahmat se habib-e-azali ko

kya kya nahin allah ne bakhsha shab-e-meraj

ta der rahi talib-o-matlub mein qurbat

dil bhar ke maza wasl ka lauta shab-e-meraj

kanon ne suna jo kabhi kanon na suna tha

ankhon ne na dekha tha jo dekha shab-e-meraj

alam ko kiya mast-e-mai-e-husn-e-azal ne

bekar raha saghar-o-mina shab-e-meraj

naalain-e-mubarak ka hua fakhr jo hasil

bas jhum gaya arsh-e-mualla shab-e-meraj

allah ka didar mohammad ki shafaat

mail ko mili hashr ke din ya shab-e-meraj