حسن نے مان لیا قابل تعزیر مجھے

حسن نے مان لیا قابل تعزیر مجھے

نظر آئی ہے محبت کی یہ تقصیر مجھے

کیوں نہ ہو بادۂ سرجوش کی توقیر مجھے

مل گئی پیر خرابات سے تحریر مجھے

جلوۂ حسن کے مفہوم پہ جب غور کیا

ایک دھندلی سی نظر آئی ہے تصویر مجھے

اب مری وحشت رسوا کا عجب عالم ہے

کر دیا آپ نے وابستۂ زنجیر مجھے

بے تکلف رخ زیبا سے اٹھائے وہ نقاب

حسن خود پائے گا ایک پیکر تصویر مجھے

زندگی اک نئے عالم میں نظر آتی ہے

لے چلی آج کہاں گردش تقدیر مجھے

کھچ گئی دل کشئ حسن مری نظروں میں

جی بہلنے کو ملی آپ کی تصویر مجھے

زلف شب گوں رخ انور کی ستائش کو سوا

کوئی مضمون نہ ملا قابل تحریر مجھے

حسن دل کش کے تلون پہ نظر جب پہنچی

نہ رہا پھر گلۂ گردش تقدیر مجھے

husn ne man liya qabil-e-taazir mujhe

nazar ai hai mohabbat ki ye taqsir mujhe

kyun na ho bada-e-sarjosh ki tauqir mujhe

mil gai pir-e-kharabat se tahrir mujhe

jalwa-e-husn ke mafhum pe jab ghaur kiya

ek dhundli si nazar ai hai taswir mujhe

ab miri wahshat-e-ruswa ka ajab alam hai

kar diya ap ne wabasta-e-zanjir mujhe

be takalluf rukh-e-zeba se uthae wo naqab

husn-e-khud paega ek paikar-e-taswir mujhe

zindagi ik nae alam mein nazar ati hai

le chali aj kahan gardish-e-taqdir mujhe

khich gai dil kashi-e-husn miri nazron mein

ji bahalne ko mili ap ki taswir mujhe

zulf-e-shab-e-gun rukh anwar ki sataish ko siwa

koi mazmun na mila qabil-e-tahrir mujhe

husn-e-dil kash ke talawwun pe nazar jab pahunchi

na raha phir gila-e-gardish-e-taqdir mujhe