حسن جب مقتل کی جانب تیغ براں لے چلا

حسن جب مقتل کی جانب تیغ براں لے چلا

عشق اپنے مجرموں کو پا بہ جولاں لے چلا

آرزوئے دید جاناں بزم میں لائی مجھے

بزم سے میں آرزوئے دید جاناں لے چلا

بسملوں کو زخم زخموں کو مبارک لذتیں

سوئے مقتل پھر کوئی تیغ و نمک داں لے چلا

خون ناحق کی حیا بولی ذرا منہ ڈھانک لو

ناز جب ان کو سر خاک شہیداں لے چلا

کٹ گیا عاشق سر بازار سودا بک گیا

جان لیلیٰ عشق نے دل حسن خوباں لے چلا

خاک عاشق روکنے کو دور تک لپٹی گئی

جب سمند ناز کو وہ گرم جولاں لے چلا

میرے گھر تک پاؤں پڑ کر ان کو لایا تھا نیاز

ناز دامن کھینچتا سوئے رقیباں لے چلا

دل کو جاناں سے حسنؔ سمجھا بجھا کے لائے تھے

دل ہمیں سمجھا بجھا کر سوئے جاناں لے چلا

husn jab maqtal ki janib tegh-e-burran le chala

ishq apne mujrimon ko pa ba jaulan le chala

arzu-e-did janan bazm mein lai mujhe

bazm se main arzu-e-did janan le chala

bismilon ko zakhm zakhmon ko mubarak lazzaten

su-e-maqtal phir koi tegh-o-namak dan le chala

khun-e-nahaq ki haya boli zara munh dhank lo

naz jab un ko sar-e-khak-e-shahidan le chala

kat gaya ashiq sar-e-bazar-e-sauda bik gaya

jan-e-laila ishq ne dil husn-e-khuban le chala

khak-e-ashiq rokne ko dur tak lipti gai

jab samand-e-naz ko wo garm jaulan le chala

mere ghar tak paon par kar un ko laya tha niyaz

naz daman khinchta su-e-raqiban le chala

dil ko janan se husn samjha bujha ke lae the

dil hamen samjha bujha kar su-e-janan le chala