حسن و الفت میں خدا نے ربط پیدا کر دیا

حسن و الفت میں خدا نے ربط پیدا کر دیا

درد دل مجھ کو دیا تم کو مسیحا کر دیا

خوب کی تقسیم تو نے اے خیال زلف یار

دل کو نذر داغ سر کو وقف سودا کر دیا

جان لے لینا جلانا کھیل ہے معشوق کا

آنکھ سے مارا لب نازک سے زندہ کر دیا

مجھ کو شکوہ ہے کہ دل کا خون قاتل نے کیا

دل یہ کہتا ہے مجھے قطرے سے دریا کر دیا

ناز ہو یا دلبری افسوں ہو یا جادوگری

سب کو قدرت نے تری چتون کا حصہ کر دیا

دل ادھر رخصت ہوا ہوش اس طرف چلتے ہوئے

کس کی آنکھوں نے یہ در پردہ اشارا کر دیا

میں کہاں چاہت کہاں یہ سب کرشمے دل کے ہیں

تم پہ خود شیدا ہوا مجھ کو بھی شیدا کر دیا

مرحبا اے ساقیٔ جادو نظر صد مرحبا

مست آنکھوں نے مرا نشہ دوبالا کر دیا

دل تڑپتا ہے تو کچھ تسکین ہوتی ہے جلیلؔ

جی بہلنے کو خدا نے درد پیدا کر دیا

husn-o-ulfat mein khuda ne rabt paida kar diya

dard-e-dil mujh ko diya tum ko masiha kar diya

khub ki taqsim tu ne ai khayal-e-zulf-e-yar

dil ko nazr-e-dagh-e-sar ko waqf-e-sauda kar diya

jan le lena jalana khel hai maashuq ka

ankh se mara lab-e-nazuk se zinda kar diya

mujh ko shikwa hai ke dil ka khun-e-qatil ne kiya

dil ye kahta hai mujhe qatre se dariya kar diya

naz ho ya dilbari afsun ho ya jadugari

sab ko qudrat ne tiri chitwan ka hissa kar diya

dil idhar rukhsat hua hosh is taraf chalte hue

kis ki ankhon ne ye dar parda ishara kar diya

main kahan chahat kahan ye sab karishme dil ke hain

tum pe khud shaida hua mujh ko bhi shaida kar diya

marhaba ai saqi-e-jadu nazar sad marhaba

mast ankhon ne mira nasha dobala kar diya

dil tarapta hai to kuchh taskin hoti hai jalil

ji bahalne ko khuda ne dard paida kar diya