حسن کا دیکھ ہر طرف گل زار — علیم اللہ

Arooz is now on the App Store, for iPhone and iPad. Download →

علیم اللہ

حسن کا دیکھ ہر طرف گل زار

عندلیباں ہوئے ہیں دل افگار

عشق کی مے سوں جو ہوا سرمست

دل ہوا اس کا خانۂ خمار

یار آیا ہے جب معالج ہو

درد فرقت میں نہیں رہا بیمار

آپ عاشق ہے حسن پر اپنے

ہے مرے جان کا عجب اسرار

کہیں عاشق کہیں ہوا دلبر

کہیں معشوق کیں ہوا دل دار

کیں ہوا شمس کیں ہوا ہے قمر

کیں ہوا نور کیں ہوا ہے نار

کیں ہوا ارض کیں ہوا ہے فلک

کیں ہوا بحر کیں ہوا اشجار

کیں ہوا انس کیں ہوا ہے ملک

کیں ہوا دید کیں ہوا دیدار

کیں پیمبر کہیں ہوا ہے ولی

کیں ہوا شیخ کیں ہوا زنار

کیں ہے قاضی کہیں ہوا مفتی

کیں ہوا مست کیں ہوا ابرار

کیں ہوا جان کیں ہوا جاناں

سب میں ہے اور کہیں سبھوں سے پار

حق میں حق ہو سدا انا الحق بول

دیکھ منصور کیوں چڑھا ہے دار

اک پنا ذات کا علیمؔ اللہ

شرع بن غیر کچھ نہ کر تکرار