حسن کافر شباب کا عالم

حسن کافر شباب کا عالم

سر سے پا تک شراب کا عالم

عرق آلود چہرۂ تاباں

شبنم و آفتاب کا عالم

وہ مری عرض شوق بے حد پر

کچھ حیا کچھ عتاب کا عالم

اللہ اللہ وہ امتزاج لطیف

شوخیوں میں حجاب کا عالم

ہمہ نور و سرور کی دنیا

ہمہ حسن و شباب کا عالم

وہ لب جوئبار و موسم گل

وہ شب ماہتاب کا عالم

زانوئے شوق پر وہ پچھلے پہر

نرگس نیم خواب کا عالم

دیر تک اختلاط راز و نیاز

یک بیک اجتناب کا عالم

لاکھ رنگیں بیانیوں پہ مری

ایک سادہ جواب کا عالم

غم کی ہر موج موج طوفاں خیز

دل کا عالم حباب کا عالم

دل مطرب سمجھ سکے شاید

اک شکستہ رباب کا عالم

وہ سماں آج بھی ہے یاد جگرؔ

ہاں مگر جیسے خواب کا عالم

husn-e-kafir shabab ka alam

sar se pa tak sharab ka alam

irq alud chehra-e-taban

shabnam-o-aftab ka alam

wo miri arz-e-shauq-e-be had par

kuchh haya kuchh itab ka alam

allah allah wo imtizaj-e-latif

shokhiyon mein hijab ka alam

hama nur-o-surur ki duniya

hama husn-o-shabab ka alam

wo lab joibar-o-mausam-e-gul

wo shab-e-mahtab ka alam

zanu-e-shauq par wo pichhle pahar

nargis-e-nim khwab ka alam

der tak ikhtilat raz-o-niyaz

yak bayak ijtinab ka alam

lakh rangin bayaniyon pe miri

ek sada jawab ka alam

gham ki har mauj mauj-e-tufan khez

dil ka alam habab ka alam

dil-e-mutrib samajh sake shayad

ik shikasta rabab ka alam

wo saman aj bhi hai yad jigar

han magar jaise khwab ka alam