حسن کے دل میں جگہ پاتے ہی دیوانہ بنے

حسن کے دل میں جگہ پاتے ہی دیوانہ بنے

ہم ابھی راز بنے ہی تھے کہ افسانہ بنے

کہہ دیا ہے کہ ملو ہم سے تو یکسو ہو کر

اب نبھے یا نہ نبھے ان سے بنے یا نہ بنے

آج وہ بزم میں خود شمع بنے بیٹھے ہیں

ہے کوئی مدعیٔ سوز جو پروانہ بنے

دل آزردہ ہے لبریز حدیث غم عشق

میں اگر چاہوں تو ہر سانس اک افسانہ بنے

کتنے دیوانے محبت میں مٹے ہیں سیمابؔ

جمع کی جائے جو خاک ان کی تو ویرانہ بنے

husn ke dil mein jagah pate hi diwana bane

ham abhi raz bane hi the ke afsana bane

kah diya hai ke milo ham se to yakso ho kar

ab nibhe ya na nibhe un se bane ya na bane

aj wo bazm mein khud shama bane baithe hain

hai koi muddai-e-soz jo parwana bane

dil-e-azurda hai labrez hadis-e-gham ishq

main agar chahun to har sans ik afsana bane

kitne diwane mohabbat mein mite hain simab

jama ki jae jo khak un ki to wirana bane